У першую нядзелю мая ў Гродзенскай дыяцэзіі адзначаецца Дзень маці, калі ва ўсіх касцёлах і капліцах Гродзеншчыны ўзносяцца малітвы за жывых і памерлых мам з падзякай за іх неацэнны ўнёсак у грамадскае жыццё і выхаванне ў веры будучых пакаленняў.
Як паведамляецца на партале Grodnensis.by, 2 мая галоўныя ўрачыстасці Дня маці адбыліся ў санктуарыi Маці Божай Яснагорскай на ўзгорку Надзеі ў Капцёўцы, дзе маліліся за ўсіх маці Гродзенскай дыяцэзіі.
Цэлебрацыю святой Імшы ў інтэнцыі ўсіх жывых і памерлых матуль узначаліў біскуп Гродзенскі Аляксандр Кашкевіч.
У гаміліі іерарх адзначыў, што ў гэты час, калі прырода абуджаецца ад зімовага сну, а ўсё навокал набывае колеры і ззянне, мы звяртаемся сваімі сэрцамі, думкамі і ўспамінамі да самых дарагіх, самых блізкіх, самых мілых нам людзей: нашых матуль.
Біскуп казаў пра любоў мамы — адзіную ў сваім родзе, найпрыгажэйшую, найчысцейшую, найбольш бескарыслівую.
«Гэта любоў, якая ніколі не падвядзе, не пакіне, не здрадзіць. Матчына любоў — адзін з самых цудоўных дароў, якія Бог дае чалавеку», — падкрэсліў іерарх.
Па словах пастыра Касцёла на Гродзеншчыне, таксама Езус Хрыстус, сапраўдны Бог і сапраўдны Чалавек, спазнаў цуд матчынай любові, бо Пан Бог у сваім Провідзе пастанавіў, каб Яго адзінародны Сын меў зямную Маці — Марыю, якая пад крыжам стала Маці кожнага чалавека.
«Марыя стала Маці кожнага вызнаўцы Хрыста; кожнага чалавека, які належыць да супольнасці Яго вучняў», — сказаў біскуп, адзначыўшы, што ніхто з нас, хрысціянаў, не можа адчуваць сябе сіратой, нават калі з нейкай прычыны застаўся без мамы.
Звяртаючыся да ўсіх маці, прысутных у святыні, біскуп заахвоціў, каб кожная мама клапацілася таксама аб рэлігійным выхаванні сваіх дзяцей, аб іх несмяротнай душы.
«Што з таго, калі б такая маці дала дзіцяці нават усе скарбы свету, але не дала веры, не навучыла малітве, не прывіла прынцыпаў хрысціянскага жыцця? Бедным было б такое дзіця, бедным і нешчаслівым», — сцвердзіў іерарх.
Дзякуючы ўсім маці дыяцэзіі за прыклад веры і руплівасць у выхаванні маладых пакаленняў, біскуп Гродзенскі даручыў іх і іх сем’і Марыі, нашай нябеснай Маці і Каралеве.
У гэты дзень, цэлебруючы Імшу за ўсіх мам дыяцэзіі, біскуп прасіў добрага Бога напаўняць іх сэрцы найвялікшай радасцю — радасцю ад таго, што дзеці жывуць верай, маюць Бога ў сэрцы і ідуць праз жыццё добрай дарогай.
На заканчэнне ўрачыстасці кусташ санктуарыя на ўзгорку Надзеі ксёндз Міхал Ластоўскі выказаў удзячнасць іерарху, а таксама разам са сваёй парафіяльнай супольнасцю павіншаваў яго з імянінамі.
