1 мая, ва ўспамін святога Юзафа рамесніка, у парафіі Святой Сям’і ў Лідзе адбыўся дзень засяроджання і малітвы праз заступніцтва Абранніка Багародзіцы і Апекуна паўсюднага Касцёла.
Як паведамляецца на партале Grodnensis.by, набажэнства ў першы дзень месяца мая, асаблівым чынам прысвечанага Панне Марыі, прайшло з удзелам біскупа Юзафа Станеўскага ў межах абвешчанага Папам Францішкам юбілейнага года святога Юзафа.
Па распараджэнні біскупа Гродзенскага Аляксандра Кашкевіча касцёл Святой Сям’і ў Лідзе з’яўляецца юбілейнай святыняй, дзе ў гэты год можна атрымаць адпусты.
Асаблівай падзеяй для парафіяльнай супольнасці стала прыбыццё фігуры Маці Божай Каралевы паратунку з Мілана.
На працягу ўсяго дня парафіяне мелі магчымасць узносіць малітвы праз заступніцтва Найсвяцейшай Панны Марыі і святога Юзафа, разважаць над яго асобай, а таксама прыступіць да сакрамэнту пакаяння і такім чынам атрымаць поўны адпуст.
Кульмінацыяй дня стала ўрачыстая святая Імша, цэлебрацыю якой узначаліў Генеральны вікарый Гродзенскай дыяцэзіі біскуп Юзаф Станеўскі.
