17 красавіка на цвінтары касцёла Найсвяцейшай Тройцы (святога Роха) у Мінску з’явілася бэзавая алея ў гонар медыкаў Беларусі, якія памерлі ад каранавірусу.
Вернікі разам з пробашчам парафіі ксяндзом канонікам Юрыем Санько арганізавалі талаку, падчас якой пасадзілі 100 кустоў бэзу.
Гэтая лічба невыпадковая: прыкладна столькі ўрачоў і медработнікаў аддалі сваё жыццё, рупліва служачы хворым у час каранавіруснай пандэміі.
Парафіяльная супольнасць моліцца за памерлых медработнікаў, а таксама мае надзею, што разам з водарам квітнеючага бэзу будзе жыць і памяць пра сапраўдных герояў нашага часу, якія выратавалі тысячы жыццяў коштам уласнага жыцця.
Нагадаем, што мінскі касцёл на Залатой Горцы носіць таксама тытул святога Роха, які з’яўляецца апекуном хворых, лекараў і шпіталяў. Святы Рох лічыцца апекуном Мінска, бо дзякуючы яго заступніцтву напрыканцы XVIII ст. у горадзе спынілася эпідэмія халеры.
