18 красавіка біскуп Гродзенскі Аляксандр Кашкевіч наведаў парафіяльную супольнасць святога Яна Паўла ІІ у Смаргоні, дзе актыўна вядзецца будаўніцтва новага касцёла.
Яку паведамляе Grodnensis.by, у парафіяльнай капліцы іерарх удзяліў вернікам, якія сабраліся на малітве, благаслаўленне Найсвяцейшым Сакрамэнтам на заканчэнне адарацыі.
Потым пастыр Касцёла на Гродзеншчыне скіраваўся на будоўлю. Пробашч парафіі ксёндз Яўген Учкуроніс пазнаёміў іерарха з этапамі будаўніцтва касцёла, сцены якога паступова ўзводзяцца дзякуючы дапамозе Бога і матэрыяльнай падтрымцы парафіянаў і людзей добрай волі.
Біскуп пажадаў пробашчу і ўсёй парафіяльнай супольнасці працягваць з Божай дапамогай працу па ўзвядзенні святыні, такой патрэбнай вернікам Смаргоні.
Іерарх падзякаваў ксяндзу Яўгену Учкуронісу і яго супрацоўніку вікарыю парафіі ксяндзу Віталію Валюку за духоўны клопат пра вернікаў, даручаных іх пастырскай апецы.
Парафія святога Яна Паўла ІІ была створана ў 2012 годзе. 17 лістапада 2012 г. адбылося асвячэнне крыжа і пляцоўкі пад будаўніцтва касцёла. 15 ліпеня 2013 г. біскуп Аляксандр Кашкевіч асвяціў новую капліцу.
22 кастрычніка 2014 г., у літургічны ўспамін св. Яна Паўла ІІ, біскуп асвяціў фундамент будучага касцёла.
