У сераду 31 сакавіка ў катэдральным касцёле Езуса Міласэрнага ў Віцебску біскуп Віцебскі Алег Буткевіч узначаліў цэлебрацыю святую Імшу Хрызма, у якой узялі ўдзел дэканы і некаторыя святары.
Пра падзею паведамляе партал Catholicnews.by.
«Гэтай Эўхарыстыяй мы дзякуем Богу за дар святарства — Хрыстовага святарства, у якім кожны з нас мае ўдзел у адпаведнасці са сваім станам: як свецкія, так і святары, бо кожны мае свае заданне», — падкрэсліў пастыр на пачатку літургіі.
Урачыстую Эўхарыстыю біскуп Алег цэлебраваў у інтэнцыі ўсёй Віцебскай дыяцэзіі, перадусім за святароў, братоў і сясцёр законных: тых, хто на заклік Езуса ісці за Ім адказаў «так».
У сваім слове, скіраваным да духоўных асоб, біскуп Буткевіч разважаў над веліччу багацця Божай ласкі, шчодра ўдзеленай чалавеку, якая выўляецца ў знаку асвячэння алею Хрызма і благаслаўлення алею хворых.
Пастыр Віцебскай дыяцэзіі даў некалькі парад святарам, каб з вучня Хрыстовага не ператварыцца ў функцыянера, які будзе выконваць сваё служэнне толькі як нейкую павіннасць. Сярод сродкаў, якія, паводле біскупа, дапамогуць пазбегнуць гэтай небяспекі, былі названы вяртанне да асабістай малітвы, братэрская падтрымка адзін аднаго, адзінства прэзбітэрыя ў лучнасці з Настаўнікам і Збаўцам Хрыстом і малітва Касцёла. Іерарх вызначыў як заданне для пробашчаў, «каб касцёлы не былі проста ўпрыгожваннем нашых гарадоў і вёсак, а даступным месцам малітвы для кожнага ахвотнага.
«Касцёл не павінен быць недаступным бастыёнам, але гасцінным прытулкам. Сёння касцёл павінен быць месцам, дзе чалавек сустракае Хрыста, а не месцам, дзе Яго хаваюць ад чалавека», — падкрэсліў біскуп.
Падчас цэлебрацыі святары аднавілі свае абяцанне вернасці святарскаму служэнню. Гэта адбылося ў форме ўрачыстага дыялогу духавенства з біскупам, які запытаўся ў прысутных святароў, ці гатовыя яны ісці следам за Хрыстом і адказна выконваць сваю пастырскую місію.
