19-21 сакавіка біскуп Юрый Касабуцкі, Генеральны вікарый Мінска-Магілёўскай архідыяцэзіі, правёў велікапосныя рэкалекцыі ў сталічнай парафіі Святога Духа (м-н Чыжоўка).
Выбар рэкалекцыяніста быў невыпадковы: на пачатку гэтага года з прычыны хваробы біскуп Юрый не змог прыняць удзел у пасвячэнні новапабудаванага касцёла, таму ён ахвотна прыняў запрашэнне пробашча ксяндза каноніка Яна Крэміса, каб сустрэцца з вернікамі парафіі ў часе падрыхтоўкі да светлай урачыстасці Вялікадня.
Адметна, што рэкалекцыі распачаліся ва ўспамін святога Юзафа, год якога зараз трывае ў паўсюдным Касцёле. Разважаючы над евангельскай гісторыяй пра наведванне Святой Сям’ёй Ерузалема, падчас якога Езус згубіўся ў дарозе, біскуп Юрый заахвоціў прысутных задумацца, ці заўсёды ў нашым хрысціянскім жыцці Хрыстус блізка. Марыя і Юзаф, прайшоўшы дзень дарогі, пачалі шукаць Езуса, і толькі праз тры дні знайшлі Яго ў святыні. Як сцвердзіў рэкалекцыяніст, згубіць Хрыста можна вельмі хутка, а каб адшукаць Яго нанова, патрэбен час.
Па словах іерарха, рэкалекцыі з’яўляюцца часам, які дадзены нам, каб нанова знаходзіць Хрыста.
У дні рэкалекцый іерарх узначаліў набажэнства Крыжовага шляху з удзелам дзяцей, правёў пакутнае набажэнства з рахункам сумлення, служыў вернікам у сакрамэнце пакаяння, цэлебраваў Эўхарыстыі і прамовіў шэраг рэкалекцыйных навук.
На заканчэнне рэкалекцый вернікі падзякавалі біскупу Юрыю за яго пастырскую паслугу, павіншавалі з надыходзячым святам Пасхі і пажадалі моцнага здаро’ўя, каб іерарх і надалей мог аддана служыць Касцёлу і Айчыне.
