19 сакавіка, ва ўрачыстасць святога Юзафа, парафію Божага Цела ў Мінску, якой апякуюцца кармэліты босыя, наведаў арцыбіскуп Тадэвуш Кандрусевіч.
Іерарх у суправаджэнні настаяцеля мясцовай супольнасці кармэлітаў босых айца Сяргея Трысценя OCD пабываў на будаўнічай пляцоўцы касцёла і кляштара, пасля чаго памаліўся разам з вернікамі набажэнства Крыжовага шляху і ўзначаліў цэлебрацыю ўрачыстай Эўхарыстыі ў гонар святога Юзафа, Абранніка Найсвяцейшай Панны Марыі.
У гаміліі арцыбіскуп заахвоціў браць прыклад са святога Юзафа, які, не вагаючыся, заставаўся паслухмяным Богу нават насуперак надзеі.
Як адзначыў іерарх, праз вернасць Божаму запавету святы Юзаф стаў добрым і верным слугой свайго Пана.
Варта дадаць, што супольнасці Кармэля, згодна з прыкладам святой Тэрэзы ад Езуса, Доктара Касцёла і рэфарматаркі ордэна, з’яўляюцца вялікімі шанавальнікамі святога Юзафа.
Душпастыры і вернікі парафіі падчас супольнай малітвы падзякавалі Богу за дар святога Юзафа паўсюднаму Касцёлу і Кармэлю ў Беларусі, а таксама падзякавалі арцыбіскупу Тадэвушу за шматгадовае, вернае і непахіснае служэнне Богу і Касцёлу ў Беларусі.
