4 сакавіка на сустрэчы моладзі парафіі Найсвяцейшага Сэрца Езуса ў Наваполацку вядомая пісьменніца Ірына Жарнасек распавяла пра сястру Ванду Банішэўскую, беатыфікацыйны працэс якой распачаўся летась.
На сустрэчы маладыя парафіяне даведаліся, што сястра Ванда, якая паходзіла з Беларусі і належала да супольнасці сясцёр ад Анёлаў, насіла на сабе раны Хрыста. Падобныя раны — стыгматы — мелі таксама святы Францішак і святы айцец Піо. З’ява гэтая даволі рэдкая і таямнічая.
«Наша зямлячка, сястра Ванда Банішэўская таксама мела і гонар, і боль, і вялікую адказнасць — мець на сваім целе адзнакі Хрыстовых пакутаў», — адзначаецца на старонцы наваполацкай парафіі ў сацыяльнай сетцы Вк.
Лёс сястры Ванды Банішэўскай надзвычай цікавы, напоўнены і радасцю служэння Богу, і пераследам за гэтае служэнне — сястра Ванда была вязнем сталінскага ГУЛАГу.
