28 лютага ў парафіі Святога Духа ў Гродне (Альшанка) служба алтара павялічылася на 20 чалавек. Цэлебрацыю святой Імшы ўзначаліў біскуп Юзаф Станеўскі.
На працягу амаль года хлопцы праходзілі адпаведную падрыхтоўку, пасля чаго сдалі залік па тэорыі і практыцы. Малодшаму з кандытаў пяць гадоў, старэйшаму — трынаццаць. Не ўсе з іх умеюць чытаць, але кожны з іх адчуў пакліканне да службы міністранта.
Падчас святой Імшы кандыдаты далі абяцанні служыць пры алтары пабожна, ахвотна і радасна на Божую хвалу і дзеля ўсёй парафіяльнай супольнасці, просячы заступніцтва ў апекуноў міністрантаў святога Дамініка Савіо і святога Тарцызія.
З рук іеарарха яны атрымалі комжы, якія апранулі ўпершыню.
У гаміліі іерарх падкрэсліў, што пра Бога можна сведчыць не толькі словам, але і дзеяннем, у касцёле і па-за ім: у школе, садку, на вуліцы з сябрамі і ў сям’і.
Пробашч парафіі кс. канонік Павел Салабуда, у сваю чаргу, падзякаваў бацькам міністрантаў за выхаванне іх дзяцей у веры, і звярнуўся да хлопцаў, якія ўпершыню апранулі комжу: «Жадаю, каб вы былі добрымі хлопцамі, каб бацькі ганарыліся вамі».
Разам з новымі 20 міністрантамі служба алтара ў парафіі Святога Духа перавысіла 100 чалавек.
Для міністрантаў пры парафіі праводзяцца заняткі, дні засяроджання, а таксама розныя цікавыя мерапрыемствы і супольны адпачынак.
