![](/3/images/news/2021/01/12769/2021-01-25-kaplica.jpg)
Кожны, хто штодзённа сутыкаецца з нашай рэчаіснасцю, безумоўна, заўважае, што мы жывем не толькі ў цікавы, але перадусім у вельмі складаны час.
Гэты час, у які нам давялося жыць, цяжкі для ўсіх і ва ўсіх вымярэннях. Рэдакцыя парталу Catholic.by цяпер таксама перажывае няпросты перыяд. Таму асабліва прыемна і радасна адчуваць шчодрую і бескарыслівую дапамогу звычайных людзей, якія, самі знаходзячыся ў цяжкіх умовах, імкнуцца дапамагчы тым, чым могуць. Тым больш каштоўным у вачах Бога з’яўляецца евангельскі «ўдові грош», якім чытачы парталу Catholic.by імкнуцца падтрымаць яго рэдакцыю.
Ад імя ўсіх супрацоўнікаў парталу я шчыра дзякую ўсім тым, хто фінансава падтрымлівае нашу дзейнасць праз электронныя пераводы на сайце, а таксама праз ахвяраванні, складзеныя ў скарбонкі Catholic.by, якія размешчаны ў некаторых касцёлах.
Сёння я выказваю асаблівую падзяку вернікам парафіі Хрыста Збаўцы ў Мінску, якія па ўласнай ініцыятыве вырашылі сваімі ахвяраваннямі падтрымаць дзейнасць парталу Касцёла ў Беларусі.
Няхай добры Бог, які бачыць патаемнае, аддзячыць вам і вашым блізкім сваім благаслаўленнем і напоўніць сэрцы радасцю і супакоем ў гэты складаны для ўсіх нас час.