9 студзеня ў Бабруйску адбыўся шосты «Сямейны баль».
Ідэя праводзіць у перыяд Божага Нараджэння балі для парафіян належыць сястры Аўгустыне з Кангрэгацыі Сясцёр св. Дамініка, якая да 2017 года працавала ў Бабруйску. Але парафiяне працягваюць гэтую традыцыю i зараз дзякуючы Уладзіславу і Алене Валаховіч з дабрачыннага фонду ў абарону жыцця і сям’і «Адкрытыя сэрцы». Яны праводзяць балі ў падтрымку традыцыйных сямейных каштоўнасцяў па ўсёй Беларусі.
Як распавяла саарганізатарка балю Галіна Паўленка, сёлета на імпрэзе сабраліся восем сужэнскіх пар рознага ўзросту. Мэта гэтых сямейных сустрэч не толькі ў сумесных танцах, але значна глыбей: у тым, каб засяродзіць увагу на адносінах паміж сужонкамі, аднавіць пачуцці адно да аднаго, каб адчуць вартасць і неверагоднасць сужэскага жыцця.
Баль праходзіў у канцэртнай зале бабруйскага санаторыя, атмасфера якога вельмi адпавядала фармату мерапрыемства.
«У час эпідэміі, калі большасць людзей знаходзіцца ў ізаляцыі і не мае магчымасці збірацца разам, мы прыйшлі сюды, каб сведчыць: наша любоў да жыцця мацней за страх перад смерцю. Гэты баль, сапраўды, неверагодны: у гэтым годзе ён адзіны сярод католікаў Беларусі, і ў гэтым сэнсе Бабруйску няма роўных!» — зазначыў кіраўнік фонду «Адкрытыя сэрцы» Уладзіслаў Валаховіч.
Твары сужонкаў, якія злучыліся ў танцы, выпраменьвалі любоў да жыцця і адно да аднаго. Пад гукі сярэднявечнай музыкі кожны з прысутных мог стаць сведкам перамогі любові і жыцця над страхам, болем і смерцю.
