На пачатку лістапада ў Навагрудку (Гродзенская дыяцэзія) адбыўся Трэці малітоўны кангрэс у абарону жыцця і сям’і, адна з мэтаў якога — пакаянне за грахі нашага народа супраць жыцця.
Цэнтральным момантам трохдзённага Кангрэсу стала пакаянная пілігрымка, якая прайшла 4 лістапада з Навагрудка ва Уселюб.
Увечары таго ж дня пасля святой Імшы адбыўся ўрачысты акт пакаяння у касцёле святога Архнёла Міхала, у якім удзельнічалі таксама Мітрапаліт Мінска-Магілёўскі арцыбіскуп Юзаф Станеўскі і Старшыня Канферэнцыі Каталіцкіх Біскупаў у Беларусі біскуп Віцебскі Алег Буткевіч.
Многія удзельнікі найбольшую ўвагу надаюць менавіта малітоўнай і пакаяннай частцы кангрэса, разумеючы неабходнасць перапрашаць за грахі абортаў, кантрацэпцыі, штучнага апладнення і распусты, якія адбываюцца навокал.
Але сёлета многія ўдзельнікі, у тым ліку госці с Расіі, засталіся і на навуковую частку, прысвечаную пытанням выхавання дзяцей, у тым ліку палавога выхавання.
Аб планах увесці ў школах курс палавога выхавання сёлета паведаміла Міністэрства адукацыі, і менавіта таму галоўныя арганізатары кангрэса — дабрачынны фонд «Адкрытыя сэрцы» і Экспертная рада па пытаннях жыцця і сям’і пры Мінска-Магілёўскай архідыяцэзіі — вырашылі прысвяціць гэтай тэме асаблівую ўвагу. Многія ўдзельнікі кангрэса прыехалі ў Навагрудак разам з дзецьмі, таму зразумела, што пытанні выхавання былі для іх вельмі актуальнымі.
Упершыню падчас кангрэсу паўстала пытанне пашырэння лічбавых тэхналогій, якія ўсё больш уваходзяць у штодзённае жыцце і перадусім закранаюць дзяцей.
Удзельнікі кангрэса з энтузіязмам даведаліся, што напрыканцы лістапада ў Мінску адбудзецца адмысловая канферэнцыя на гэтую тэму, бо вернікі не могуць заставацца абыякавымі да новых выклікаў, якія свет сёння ставіць перад Касцёлам.
