Пошук

11.01.2021 14:59   Тэкст: кс. Ян Крэміс / Фота: Віталій Палінеўскі / Catholic.by

9 студзеня Мітрапаліт Мінска-Магілёўскі на пенсіі арцыбіскуп Тадэвуш Кандрусевіч здзейсніў урачыстае пасвячэнне касцёла Святога Духа ў мікрараёне Чыжоўка ў Мінску.

У літургіі прынялі ўдзел дапаможны біскуп Мінска-Магілёўскай архідыяцэзіі Аляксандр Яшэўскі SDB, ксяндзы прэлаты і канонікі, іншыя запрошаныя святары і кансэкраваныя асобы.

Будаўніцтва касцёла працягвалася восем гадоў. Благаслаўленне зямлі пад будову і вуглавога каменя адбылося 19 мая 2012 г. Пасвячэнне касцёла стала знакавай падзеяй як для самой сталічнай парафіі Святога Духа, так і для мясцовага Касцёла. З’явілася яшчэ адна новая святыня, якая стала месцам сустрэчы чалавека з Богам.

У гаміліі арцыбіскуп Тадэвуш нагадаў пра ролю і значэнне сямі сакрамэнтаў, якія цэлебруе Касцёл, а таксама параўнаў пасвячэнне будынка касцёла з хростам чалавека.

Дзіця нараджаецца, але хрост распачынае яго духоўны рост і сталенне. Праз абрад пасвячэння касцёл стаў сакральным будынкам, святыняй для цэлебрацыі святых сакрамэнтаў і малітвы, месцам, дзе народ Божы будзе ўзрастаць у пабожнасці і святасці.

Напрыканцы літургіі арцыбіскуп падзякаваў усім, хто прычыніўся да пабудовы новага касцёла ў мікрараёне Чыжоўка, і ўручыў падзячную грамату з нагоды яго пасвячэння.

Падчас Імшы прысутныя таксама маліліся за спачылага ксяндза прэлата Юзафа Бульку ў 11-ю гадавіну смерці, якая выпала акурат на дзень пасвячэння касцёла, пробашчам якога з’яўляецца яго вучань — ксёндз канонік доктар Ян Крэміс.

Словы ўдзячнасці ў адрас арцыбіскупа Тадэвуша Кандрусевіча і гасцей гучалі ад прадстаўнікоў парафіі. Выходзячы з новапасвячанай святыні, усе прысутныя атрымалі выдадзены з гэтай нагоды Апостальскі ліст Святога Айца Францішка Patris corde і салодкі пачастунак з выявай касцёла Святога Духа.

           

 

Абноўлена 11.01.2021 19:25
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа