У нядзелю 29 лістапада, у першы дзень Адвэнту, у касцёле Найсвяцейшай Тройцы (св. Роха) на Залатой Горцы адкрылася фотавыстава «Рараты» фатографа Віктара Ведзеня.
Год таму выстава была ўпершыню паказана ў народным фотаклубе «Мінск».
Летам бягучага года серыя фотапрац была прадстаўлена ў намінацыі «мастацкая фатаграфія» на Рэспубліканскай выставе «Трыенале сучаснага мастацтва» па выніках Рэспубліканскага конкурсу «Нацыянальная прэмія ў галіне выяўленчага мастацтва» ў 2019–2020 гадах.
«Гэта ўжо трэцяя выстава, паказаная на працягу года ў гэтай святыні, заключная.
Спадзяюся, што яна заахвоціць людзей браць большы ўдзел у раратніх святых Імшах і перажыць радасны момант чакання Нараджэння Езуса Хрыста», — дзеліцца аўтар.
Наведаць выставу «Рараты» можна да 25 снежня ў касцёле Найсвяцейшай Тройцы (св. Роха) у Мінску па адрасе: пр-т Незалежнасці, 44-А.
