У нядзелю 18 кастрычніка вернікі парафіі святога Андрэя, Апостала, у Нарачы (Мядзельскі дэканат) ушанавалі святога Яна Паўла ІІ у 100-ю гадавіну з дня нараджэння Вялікага Папы.
Цэлебрацыю святой Імшы з гэтай нагоды ўзначаліў пробашч нарачанскай парафіі айцец Бэрнард Радзік OCD. Ён шчыра прывітаў усіх прысутных у касцёле вернікаў, пажадаўшы ім праз заступніцтва Маці Божай і святога Яна Паўла ІІ заўсёды быць моцнымі верай.
На заканчэнне Эўхарыстыі адбылося ўзнагароджанне ўдзельнікаў анлайн-конкурсу ведаў і конкурсу малюнкаў, якія праходзілі ў Нарачы ўвесну і былі прымеркаваны да 100-годдзя з дня нараджэння святога Яна Паўла ІІ.
Пасля цырымоніі парафіяне разам са сваімі душпастырамі ў працэсіі прайшлі да помніка Вялікага Папы на прыкасцёльным цвінтары. Там адбылася адмысловая малітва і ўшанаванне рэліквій святога Яна Паўла ІІ, якія з пашанай захоўваюцца ў нарачанскім касцёле.
