Кожную чацвёртую нядзелю месяца ў дольнай частцы касцёла святога Аляксандра ў Варшаве будзе цэлебравацца святая Імша ў інтэнцыі Беларусі.
Як паведаміла КАІ, гэта адказ на просьбы беларусаў, якія пражываюць у Варшаве, і салідарных з імі палякаў, якія з пачатку беспарадкаў у Мінску спантанна моляцца аб міры і вырашэнні нарастаючага крызісу ва ўсходніх суседзяў Польшчы.
Першая Імша за Беларусь адбудзецца ў наступную нядзелю, 27 верасня, а 18-й гадзіне.
Касцёл святога Аляксандра знаходзіцца на плошчы Трох Крыжоў у Варшаве.
«Калі нам удасца знайсці святара, які гаворыць па-беларуску, Імшы будуць праходзіць менавіта на гэтай мове. Калі не, яны будуць на польскай мове, з беларускімі спевамі і чытаннямі», — адзначыла ў размове з КАІ Ганна Зялінская, беларуска, якая шмат гадоў жыве і працуе ў Польшчы. Як дадала яна, магчыма, у бліжэйшы час атрымаецца стварыць і беларускі хор.
Імшы за мір у Беларусі здзяйсняюцца з пачатку беспарадкаў і палітычнага крызісу.
Часцей за ўсё яны замаўляюцца ананімна беларусамі, якія пражываюць у Польшчы.
