Падчас свайго біскупскага пасвячэння, якое адбылося 16 верасня, арцыбіскуп Антэ Ёзіч звярнуўся са словамі прывітання да духавенства і вернікаў Касцёла на Беларусі, які, як адзначыў, «цяпер перажывае складаныя часы».
Як паведамляе беларуская рэдакцыя парталу Vatican News, Апостальскі нунцый у Беларусі паабяцаў сваё «малітоўнае супрацоўніцтва» для вырашэння ўсіх праблем краіны «з дапамогай міру, дыялогу і салідарнасці, пазбягаючы любога насілля».
«Малюся да Дзевы Марыі, каб заўсёды натхняла вас, дапамагала ў цяжкія моманты вашага жыцця»,
— сказаў іерарх на рускай мове.
Яго біскупскае пасвячэнне адбылося ў нядаўна пабудаваным касцёле Святой Сям’і санктуарыя Маці Божай Астраўной у Соліне (Харватыя). Удзяліў пасвячэнне Дзяржаўны Сакратар Яго Святасці Папы Францішка кардынал П'етро Паралін.
Папа Францішак прызначыў Антэ Ёзіча Апостальскім нунцыем у Беларусі 21 мая.
