20 жніўня моладзь са смаргонскай парафіі святога Яна Паўла ІІ узяла ўдзел у аднадзённым сплыве на байдарках па Віліі, арганізаваным у гонар 100-гадовага юбілею нябеснага апекуна іх парафіяльнай супольнасці.
На старонцы парафіі ў сацыяльнай сеці Вк паведамляецца, што сплыў распачаўся з удзелу ў святой Імшы ў касцёле Найсвяцейшай Тройцы ў Данюшаве (Смаргонскі дэканат).
Разам са сваім пробашчам ксяндзом Яўгенам Учкуронісам юнакі і дзяўчаты разам маліліся за нашу Бацькаўшчыну Беларусь праз заступніцтва святога Яна Паўла ІІ — Папы вялікіх пераменаў.
Пасля Эўхарыстыі ў прыгожай драўлянай святыні, пабудаванай больш за 200 гадоў таму, смаргонская моладзь разам правяла цудоўны дзень, у які Бог благаславіў маладых вандроўнікаў добрым надвор’ем. Сплыў па маляўнічай Віліі дапоўніла цікавая экскурсія, падчас якой Алег Мізула пазнаёміў юнакоў і дзяўчат з гісторыяй і цікавымі мясцінамі іх малой радзімы.
Ушанаваць такім чынам Вялікага Папу было вырашана невыпадкова. Рэч у тым, што святы Ян Павел ІІ вельмі любіў сплывы на байдарках.
Як святар ён шмат разоў браў у іх удзел разам са студэнцкай моладдзю, душпастырам якой з’яўляўся.
Цікавы факт: нават яго намінацыя на біскупа адбылася ў той час, калі ксёндз Караль Вайтыла разам з моладдзю ўдзельнічаў у сплыве па рацэ Лаве. Для таго, каб паведаміць пра гэта, святара падчас адной са стаянак тэрмінова выклікалі ў Варшаву. Прыняўшы прызначэнне дапаможным біскупам Кракаўскай архідыяцэзіі, будучы Папа вярнуўся на раку, каб разам з усімі завяршыць сплыў.
