27 жніўня біскуп Віцебскі Алег Буткевіч падпісаў дэкрэт, якім адмяняе дзеянне дадзенай ва ўмовах пандэміі каранавірусу дыспенсы ад абавязку ўдзелу ў святой Імшы ў нядзелі і абавязковыя ўрачыстасці.
Згодна з рашэннем Канферэнцыі Каталіцкіх Біскупаў у Беларусі, дбаючы пра духоўнае дабро вернікаў і ўлічваючы паляпшэнне сітуацыі, 1 верасня 2020 года біскуп Алег спыняе дзеянне ў Віцебскай дыяцэзіі дыспенсы ад абавязку ўдзелу ў нядзельных і ўрачыстых святых Імшах, якая была дадзена 20 сакавіка 2020 г.
Такім чынам, кожны вернік зноў мае абавязак асабістага ўдзелу ў святой Імшы ва ўсе нядзелі года і ў прадпісаныя ўрачыстасці.
Разам з тым пастыр дыяцэзіі просіць да моманту поўнага спынення эпідэміі аб захаванні мер бяспекі: прытрымлівацца сацыяльнай дыстанцыі (па меры магчымасці), карыстацца антысептыкамі і маскамі, перадаваць знак супакою праз паклон (без паціскання рук).
Нагадаем, што з 1 верасня дзеянне дадзенай пэўным катэгорыям вернікаў дыспенсы ад абавязку ўдзелу ў святой Імшы ў нядзелі і прадпісаныя ўрачыстасці спыняецца таксама ў Мінска-Магілёўскай архідыяцэзіі.
