Ужо шмат гадоў дабрачыннае каталіцкае таварыства Caritas Гродна актыўна супрацоўнічае з нямецкім аддзяленнем Мальтыйскага ордэну, сумесна з ім праводзіць праекты і атрымлівае гуманітарную дапамогу.
У межах супрацоўніцтва прадстаўнікі Мальтыйскай службы прыязджаюць у Гродна, а прадстаўнікі Caritas з мэтай атрымання досведу наведваюць місію ў Германіі.
Апошняй падтрымкай парафій Гродзенскай дыяцэзіі і Caritas сталі мікрааўтобусы, перададзеныя Мальтыйскай службай для сацыяльных праектаў.
Два мікрааўтобусы былі дастаўлены ў Гродна з Германіі ў канцы 2019 года і ўжо ўдзельнічаюць у праектах, якія праводзяцца ў парафіі ў Альшанцы і супрацоўнікамі Caritas у Гродне для дапамогі канкрэтным людзям, для каталіцкіх мерапрыемстваў і дабрачыннасці.
Лейтматывам ордэну служыць дэвіз Tuitio Fidei et Obsequium Pauperum, што азначае абарону веры і служэнне бедным і хворым. Ён застаецца верным сваім перакананням і мэтам.
Caritas Гродна дзякуе Мальтыйскай службе за падтрымку і спадзяецца на далейшае плённае супрацоўніцтва ў дабрачынных праектах і дапамозе патрабуючым.
Гісторыя Мальтыйскага ордэну налічвае шмат стагоддзяў.
Гэтая маштабная арганізацыя мае ў наш час мноства аддзяленняў і праектаў па ўсім свеце, працуе ў 120 краінах.
Сёння мальтыйцы клапоцяцца пра састарэлых і хворых, лечаць людзей у сваіх шпіталях, аказваюць неадкладную дапамогу, працуюць за мяжой у гарачых кропках, а таксама проста развозяць гарачыя абеды самотным старым, лічачы сябе пасрэднікамі паміж Богам і чалавекам.
