З 8 па 12 ліпеня праходзіла ў анлайн-фармаце XXVI грэка-каталіцкая пілігрымка Віцебск – Полацк. За пяць дзён дзён у духоўнай праграме прынялі ўдзел больш за 100 чалавек.
У нядзелю 12 ліпеня ў Полацку на святочнай Боскай Літургіі, цэлебрацыю якой узначаліў Апостальскі візітатар для грэка-католікаў Беларусі архімандрыт Сяргей Гаек, пры грэка-каталіцкім храме св. Параскевы Полацкай сабралося больш за 70 вернікаў з Полацка і Віцебска і пілігрымы з Мінска, Маладзечна, Барысава. Некаторыя з іх прыехалі на роварах, невялікая група прыйшла пешкі.
Удзельнікі ўшанавалі святога Папу Яна Паўла ІІ з нагоды 100-годдзя ягонага нараджэння і дзякавалі Богу за 30-годдзе з часу першай адкрытай грэка-каталіцкай Боскай Літургіі ў Беларусі.
Яна адбылася 11 сакавіка 1990 г.
Як асаблівы духоўны дар удзельнікі святкавання ўзгадалі словы, якія Ян Павел ІІ адрасаваў грэка-католікам Беларусі 7 студзеня 2005 года: «Будзьце мужнымі! Адвагі!»
Былі таксама ўзгаданыя духоўныя настаўленні Яна Паўла ІІ: энцыкліка Slavorum Apostoli («Апосталы славян») ад 1985 г. і Апостальская адгартацыя Orientale Lumen («Святло Усходу») ад 1995 г.
Словы прывітання ўдзельнікам урачыстасці ў Полацку скіраваў Часовы павераны ў справах Святога Пасаду ў Рэспубліцы Беларусь кс. Махэр Шаммас.
На завяршэнне вернікі атрымалі благаслаўленне новай іконай св. Яна Паўла ІІ.
