Раніцай 1 ліпеня ў Будслаў прыбыў першы пілігрым — Генеральны вікарый Пінскай дыяцэзіі біскуп Казімір Велікаселец.
Найстарэйшы ў Беларусі каталіцкі іерарх прыехаў у Нацыянальны санктуарый на асабістым транспарце.
«Я прыехаў раней, каб у цішыні памаліцца перад цудатворнай іконай Маці Божай Будслаўскай. Правяду тут для сябе такія маленькія прыватныя „рэкалекцыі“», — сказаў біскуп Казімір Catholic.by.
Паколькі сёлета арганізаваныя пілігрымкі ў Будслаў адменены, шанавальнікі Маці Божай прыбываюць у Нацыянальны санктуарый у індывідуальным парадку. Такім чынам 75-гадовы біскуп, які спецыяльна для гэтага праехаў з Гомеля больш за 400 км, даў прыклад адданай сыноўскай любові да нябеснай Маці.
