28 чэрвеня ў парафіі Узвышэння Святога Крыжа ў Лідзе (Фара) адбылася гістарычная падзея: два новапрэзбітэры цэлебравалі прыміцыйныя Імшы.
Як паведаміў партал Grodnensis.by, сыны лідскай зямлі кс. Андрэй Струкель і кс. Тамаш Мікалайчык, якія напярэдадні прынялі прэзбітэрскае пасвячэнне з рук біскупа Гродзенскага Аляксандра Кашкевіча, сабралі ў роднай святыні нямала людзей. На першую Імшу да кожнага са святароў прыйшлі родныя, сябры, святары і семінарысты, сёстры законныя і вернікі парафіі.
Урачыстасці пачыналіся каля плябаніі, адкуль прыміцыянты разам з працэсіяй верных пад спеў ішлі да касцёла, дзе перад цэнтральнай брамай іх чакаў пробашч ксёндз канонік Уладзімір Гуляй.
Распачыналіся Імшы благаслаўленнем бацькоў і словамі прывітання ад пробашча, для якога гэты дзень быў па-асабліваму радасным.
На заканчэнне новапрэзбітэры ўдзялілі папскае благаслаўленне ўсім сабраным, а потым прыміцыйнае благаслаўленне бацькам, сёстрам і братам, святарам, кансэкраваным асобам і ўсім вернікам. У сувязі са складанай эпідэміялагічнай сітуаціяй ускладанне далоняў было адменена, замест яго было агульнае благаслаўленне.
