Святары з Мінска прапанавалі моладзі і іншым карыстальнікам сацыяльных сетак падзяліцца ў сваіх акаўнтах асабістымі гісторыямі з пілігрымак у Будслаў.
Паколькі ў гэтым годзе пілігрымкі ў нацыянальны санктуарый у Будславе не змогуць адбыцца з-за эпідэміі каранавірусу, многія адчуваюць тугу па магчымасці вырушыць да Маці Божай. Сёлета ў Будслаў пешкі і на роварах прыбудуць асобныя вернікі, якія не будуць арганізаваныя ў вялікія групы, як гэта адбывалася апошнія трыццаць гадоў без перапынку.
Кожная пілігрымка мае своеасаблівы дух і традыцыі, якія склаліся за многія гады.
Для падтрымання гэтага духу святары прапануюць карыстальнікам сацсетак дзяліцца з іншымі сваімі ўспамінамі з пілігрымак у Будслаў. Гэта можа стаць своеасаблівым сведчаннем пра Бога і ўнутраныя перамены чалавека, якія адбываюцца на шляху пілігрыма.
Фармат сведчанняў-успамінаў неакрэслены — гэта пакідае шырокае поле для асабістай творчасці. Для кагосьці важным будзе ўспамін пра гасціннасць людзей, якія прымалі пілігрымаў на начлег, для іншага — выпрабаванні ў дарозе і г.д.
Святары просяць пад сваімі пастамі пра пілігрымкі ставіць, як мінімум, тры хэштэгі: #успомні_Будслаў, #топаем_вместе, #budslove2020.
Такім чынам інфармацыю будзе прасцей знайсці іншым.
