16 мая, ва ўспамін святога Андрэя Баболі, святара і мучаніка, місіянера беларускай зямлі, сакрамэнт пасвячэння ў ступені дыяканату і прэзбітэрату прынялі двое беларусаў, студэнты пятага і шостага курсаў Вышэйшай місійнай семінарыі айцоў сэрцанаў у Стадніках каля Кракава (Польшча).
Сакрамэнт пасвячэння ў ступені дыяканату прыняў Генадзь Лаўніковіч SCI з Варапаева (Віцебская дыяцэзія), а ў ступені прэзбітэрату — дыякан Віталь Венцкевіч SCI з Гродна.
На Эўхарыстыі, якая адбылася ў мясцовай парафіяльнай святыні, сабраліся браты сэрцане на чале з дапаможным біскупам Люблінскай архідыяцэзіі Юзафам Врубэлем SCI, які ўдзяліў сакрамэнт пасвячэння. Іерарх заахвоціў маладых законнікаў прыгадаць дыялог Пана Езуса і Пятра, у якім Езус тройчы пытаецца ў апостала пра любоў да Яго, і няспынна задаваць сабе тое ж пытанне кожны дзень сваёй працы на ніве Пана, праяўляючы любоў да Бога і людзей у ахвярным служэнні.
Менавіта любоў, да прапаведвання якой заклікаў заснавальнік супольнасці сэрцанаў французскі святар Леон Ян Дэон у 1878 годзе, з’яўляецца важным аспектам штодзённага служэння гэтай супольнасці.
Ад сваіх законнікаў айцец Леон хацеў, каб яны «былі прарокамі любові і слугамі паяднання людзей з Богам».
Сярод гасцей на ўрачыстасці пасвячэння прысутнічаў правінцыял Польскай правінцыі айцоў сэрцанаў кс. Веслаў Свеньх SCI, які выказаў падзяку маладым законнікам за ахвяру і высілак у наследаванні Хрыста, а таксама ўдзячнасць іх бацькам і родным, якія не змаглі прыехаць на ўрачыстасць, але далучыліся да яе духоўна праз хвалі радыё Profeto.pl — сэрцанскага парталу евангелізацыі.
Харызмай сэрцанаў з’яўляецца перажыванне штодзённасці ў духу любові і ўзнагароджання за грахі чалавецтва, а таксама ўдзячнасць Найсвяцейшаму Сэрцу Пана Езуса за дар бязмернай любові да нас. Пашыраючы культ Божага Сэрца, законнікі гэтай супольнасці выходзяць з адкрытым сэрцам і розумам у свет, каб несці вестку аб збаўчай любові.
Ксёндз Віталь Венцкевіч SCI нарадзіўся 13 снежня 1993 г. у Гродне, паходзіць з парафіі Божай Міласэрнасці (Вішнявец). Пасля заканчэння школы пачаў падрыхтоўку да кансэкраванага і святарскага жыцця спачатку на Беларусі, а пасля ў Польшчы. У 2014 годзе прынёс свае першыя манаскія абяцанні, а ў 2018 — вечныя. У 2019 годзе яму ўдзяліў дыяканскае пасвячэнне біскуп Эдвард Яняк, ардынарый Каліскай дыяцэзіі (Польшча). Цяпер, пасля заканчэння фармацыі, накіроўваецца на служэнне на Беларусь. Два гады таму сакрамэнт пасвячэння ў ступені прэзбітэрату атрымаў яго родны брат, які належыць да той жа супольнасці.
Дыякан Генадзь Лаўніковіч SCI нарадзіўся 7 кастрычніка 1994 г., паходзіць з парафіі Найсвяцейшага Сэрца Езуса ў Варапаеве (Віцебская дыяцэзія). Скончыўшы сярэднюю школу ў 2012 годзе, распачаў пастулат на Беларусі і ў Польшчы. Наступным крокам быў гадавы навіцыят, які скончыўся ўрачыстым ахвяраваннем свайго жыцця Богу. 8 снежня 2019 года ён прынёс вечныя манаскія абяцанні чыстасці, паслухмянасці і ўбоства.
Супольнасць сэрцанаў на Беларусі налічвае на сённяшні дзень 13 святароў, якія нясуць служэнне ў Гродне, Астрыне, Паставах, Ляхавічах, Шаркаўшчыне і Варапаеве.
Сэрцане даручаюць у малітве Найсвяцейшаму Сэрцу новапасвячаных законнікаў, а таксама братоў беларусаў, якія працягваюць падрыхтоўку, каб служыць Касцёлу на Беларусі.
