22 красавіка, у 50-ы Сусветны дзень Зямлі, прысвечаны ахове навакольнага асяроддзя, кіраўнік беларускага каталіцкага епіскапату арцыбіскуп Тадэвуш Кандрусевіч заклікаў вернікаў памятаць пра Чарнобыльскую катастрофу і маліцца аб дажджы.
Заклік Старшыні Канферэнцыі Каталіцкіх Біскупаў у Беларусі арцыбіскупа Тадэвуша Кандрусевіча
Дарагія браты і сёстры,
выкліканы пандэміяй каранавірусу крызіс закрануў увесь свет і практычна ўсе сферы чалавечага жыцця. Каталіцкі Касцёл у Беларусі не застаецца ў баку ад гэтай надзённай праблемы і робіць свой унёсак у яе як найхутчэйшае вырашэнне. Дабрачыннае каталіцкае таварыства Caritas, іншыя структуры Касцёла і паасобныя вернікі ў меру сваіх магчымасцяў дапамагаюць хворым, медыкам і ўсім тым, хто вядзе барацьбу з эпідэміяй. У касцёлах ва ўсёй краіне штодзённа ўзносяцца малітвы аб выбаўленні ад гэтай заразнай і небяспечнай хварбы. Моляцца вернікі і прыватна, застаючыся дома ў гэтыя цяжкія дні.
Апошнім часам да праблемы каранавірусу далучылася праблема небяспечнай засухі, якая можа вельмі негатыўна паўплываць на будучы ўраджай, яшчэ больш падарваць народную гаспадарку, якой і так даводзіцца нялёгка, і пагоршыць эканамічную сітуацыю людзей.
У наступную нядзелю, 26 красавіка, прыпадае 34-я гадавіна Чарнобыльскай катастрофы. Яна стала своеасаблівай «радыёактыўнай пандэміяй», наступствы якой Беларусь і суседнія краіны адчуваюць да сённяшняга дня.
У сувязі з гэтым заклікаю вернікаў да малітваў у інтэнцыі спынення каранавірусу далучыць малітвы аб такім патрэбным дажджы, а ў нядзелю 26 красавіка памаліцца таксама за ахвяраў Чарнобыльскай катастрофы і аб тым, каб Бог нас сцярог ад падобных трагедый і экалагічных бедстваў у будучыні.
З благаслаўленнем
Арцыбіскуп Тадэвуш Кандрусевіч
Мітрапаліт Мінска-Магілёўскі, Старшыня Канферэнцыі Каталіцкіх Біскупаў у Беларусі
Мінск, 22 красавіка 2020 г.
