Біскуп Віцебскі Алег Буткевіч віншуе вернікаў з Велікоднымі святамі.
Шаноўныя святары, кансэкраваныя браты і сёстры,
дарагія вернікі, суайчыннікі!
Хрысціянская вера — гэта няспынны напамін чалавецтву пра тое, што яно не пакінутае на волю сляпога лёсу. Мы не наступствы выпадковых падзей ці здарэнняў у Сусвеце, але плён творчага акту Сутнасці, недасяжнай нам у поўнай меры, але якая паказвае нам няспынна сваю бязмежную Любоў. Сутнасці, для якой мы з’яўляемся дзецьмі, непаслухмянасць і ганарлівасць якіх Яна выпраўляе коштам свайго пасвячэння і сваёй ахвяры.
Менавіта пра гэта кажа нам Вялікдзень: твае грахі, чалавеча, прабачаныя! Але прымі, зразумей і будзь удзячны за гэта!
Вялікі пост, які мы перажылі ў гэтым годзе, быў пазначаны асаблівымі выклікамі, якія не павінны аднак пазбавіць нас даверу да Бога і спадзявання на Яго айцоўскую дабрыню і міласэрнасць да кожнага чалавека. Велікодныя святы нагадваюць нам, што Сын Божы не застаецца ўбаку ад людскіх выпрабаванняў, але сам бярэ крыж, несучы яго разам з намі, каб на ім памерці і… уваскрэснуць!
«…Будзьце адважнымі: Я перамог свет» (Ян 16, 33)! І сёння мы святкуем удзел у гэтай Перамозе! Хрыстус уваскрос! Сапраўды ўваскрос!
Гэта рэчаісная перамога Хрыста над грахом і смерцю няхай дапаможа нам нанава перагледзець нашае жыццё, убачыць і зразумець яго сэнс, ацаніць сваё месца ў ім і ўзважыць свае магчымасці, пагадзіцца з Ягонымі словамі: «Без Мяне нічога не можаце зрабіць» (Ян 15, 5). Так, гэта патрабуе пакоры, але прыклад таго дае нам сам Збаўца: «Ён, будучы ў постаці Бога, не скарыстаў з таго, каб быць нароўні з Богам, але выракся самога сябе, прыняўшы постаць слугі, прыпадобніўшыся да людзей. І з выгляду стаўшы як чалавек, прынізіў сябе, будучы паслухмяным ажно да смерці, смерці крыжовай» (Флп 2, 6-8).
Бог любіць нас! Няхай гэтая праўда напаўняе вас, дарагія браты і сёстры, радасцю і спакоем!
Няхай дае сілы ў выпрабаваннях, няхай вучыць нас быць спагадлівымі, адказнымі і міласэрнымі да саміх сябе і да нашых бліжніх!
Здароўя і Божага благаслаўлення! Хрыстус уваскрос! Са святам!
+Алег Буткевіч
Біскуп Віцебскі
