![](/3/images/news/2020/03/2020-03-23-107-SLE_0213.jpg)
21 сакавіка Мітрапаліт Мінска-Магілёўскі арцыбіскуп Тадэвуш Кандрусевіч узяў удзел у святкаванні 85-годдзя з дня нараджэння Ганаровага Патрыяршага Экзарха Усяе Беларусі Мітрапаліта Філарэта.
Старшыня Канферэнцыі Каталіцкіх Біскупаў у Беларусі прысутнічаў на святочнай Літургіі ў хатнім храме Беларускага Экзархата і на прыёме ў гонар юбіляра.
У віншавальным слове арцыбіскуп Тадэвуш Кандрусевіч, правёўшы паралель з сённяшняй сітуацыяй у свеце, які церпіць ад пандэміі, нагадаў, што Мітрапаліт Філарэт прыйшоў на Мінскую кафедру больш за 40 гадоў таму, калі наш край духоўна спусташаў вірус атэізму.
«Вы, уладыка Філарэт, былі ў авангардзе барацьбы з гэтым вірусам. Ваша настойлівасць, дыпламатычныя здольнасці, уменне распазнаваць знакі часу і хутка адказваць на іх прынеслі свой плён.
Ваша адкрытасць для дыялогу дапамагла таксама і Каталіцкаму Касцёлу ў яго адраджэнні ў Беларусі», — падкрэсліў кіраўнік беларускага каталіцкага епіскапату. Арцыбіскуп Кандрусевіч падзякаваў Мітрапаліту Філарэту за яго ўнёсак у будаванне мастоў паміж рознымі канфесіямі і пажадаў Божага благаслаўлення на будучыню.
У другой палове дня Старшыня ККББ узяў удзел у яшчэ адным мерапрыемстве, прысвечаным гэтай падзеі, — адкрыцці выставы ікон у Нацыянальным мастацкім музеі.
На цырымоніі іерарх выступіў з прамовай, у якой назваў Мітрапаліта Філарэта «чалавекам эпохі, які ў цемру атэізму ўнёс святло Евангелля».
Арцыбіскуп Кандрусевіч яшчэ раз падкрэсліў яго ролю як будаўнічага мастоў паміж Царквой і грамадствам, а таксама паміж рознымі веравызнаннямі.
![](https://catholic.by/3/templates/catholic/img/left.png)
![](https://catholic.by/3/templates/catholic/img/right.png)
![](https://catholic.by/3/templates/catholic/img/close.png)
![](https://catholic.by/3/templates/catholic/img/close.png)