9 лютага, у V звычайную нядзелю, супольнасць літургічнай службы алтара ў пінскай катэдральнай парафіі павялічылася на 10 чалавек, якія падчас святой Імшы былі прыняты ў шэраг міністрантаў.
Хлопцы прайшлі адпаведную падрыхтоўку ў якасці кандыдатаў, выдатна здаўшы тэарэтычны і практычны экзамен. Таксама яны выказалі жаданне стаць міністрантамі, каб яшчэ лепей служыць на хвалу Божую пры алтары і ў штодзённым жыцці.
Цэлебрацыю святой Імшы ўзначаліў пробашч катэдральнай парафіі кс. Павел Врубель, які далучыў іх да супольнасці міністрантаў. У гамілііі між іншым прагучалі словы ў адрас міністрантаў.
Ксёндз Павел зазначыў, што міністрант – сябра Езуса Хрыста, падкрэсліў вялікае значэнне адказнага падыходу да давераных абавязкаў і заклікаў быць сведкамі Хрыста не толькі ў касцёле падчас Імшы, але і ў штодзённасці.
Ва ўрачыстасці ўдзельнічалі шматлікія вернікі, а таксама бацькі і родныя новых міністрантаў. Гэта была вельмі важная і доўгачаканая падзея не толькі для саміх хлопцаў, але і для іх родных і ўсёй парафіяльнай супольнасці.
На заканчэнне Імшы пробашч павіншаваў новых міністрантаў і ўручыў ім пасведчанне прыняцця ў супольнасць літургічнай службы алтара. Таксама ён падзякаваў кс. Янушу Чарнамораву за добрую падрыхтоўку кандыдатаў.
Новыя міністранты і іх бацькі са свайго боку выказалі святарам словы ўдзячнасці.
Пасля Эўхарыстыі святкаванне працягнулася за салодкім сталом у парафіяльным доме.
