1 лютага Генеральны вікарый Гродзенскай дыяцэзіі біскуп Юзаф Станеўскі адзначыў шостую гадавіну прыняцця біскупскага пасвячэння.
Як паведамляе партал Гродзенскай дыяцэзіі Grodnensis.by, іерарх узначаліў цэлебрацыю святой Імшы ў капліцы Міждыяцэзіяльнай вышэйшай духоўнай семінарыі ў Гродне, рэктарам якой доўгі час з’яўляўся. На Эўхарыстыі сабралася ўся семінарыйная супольнасць.
Біскуп звярнуўся да прысутных святароў і семінарыстаў з гаміліяй, у якой, разважаючы над Евангеллем, параўнаў сённяшні свет з акіянам і дадаў, што, «каб гэты акіян нас не паглынуў, трэба быць з Езусам, плысці ў Яго чаўне».
Падчас Імшы іерарх падзякаваў Богу за дар паўнаты святарства і за ўсіх людзей, да якіх Пан пасылаў яго штодзённа, а таксама папрасіў аб малітве ў яго інтэнцыі.
Сённяшні Генеральны вікарый Гродзенскай дыяцэзіі прыняў біскупскае пасвячэнне 1 лютага 2014 г. у катэдральнай базыліцы св. Францішка Ксавэрыя ў Гродне.
