На гэтым тыдні Касцёл адзначае літургічны ўспамін святога Францішка Сальскага, апекуна журналістаў. З гэтай нагоды 19 студзеня ў мінскай парафіі св. Яна Евангеліста і св. Максімільяна Кольбэ прайшлі акцыі, прысвечаныя каталіцкім СМІ.
Пасля кожнай Імшы святары распавядалі вернікам аб важнасці каталіцкай прэсы і неабходнасці яе падтрымкі. Выступілі прадстаўнікі каталіцкіх СМІ, у тым ліку рэдакцый парталаў Catholic.by і Jan.by. Яны казалі пра ролю сучасных сродкаў сацыяльнай камунікацыі ў справе абвяшчэння Добрай Навіны і складанасцях, звязаных з выкананнем гэтай місіі. Журналісты і валанцёры падзяліліся сведчаннямі аб сваім служэнні, а таксама запрасілі парафіянаў да ўдзелу ў фармаванні сучаснай медыяпрасторы.
Падчас гэтых акцый быў арганізаваны збор ахвяраванняў на падтрымку каталіцкіх СМІ Мінска-Магілёўскай архідыяцэзіі.
Успамін святога Францішка Сальскага, які адзначаецца ў Касцёле 24 студзеня, лічыцца патранальным святам усіх супрацоўнікаў каталіцкіх СМІ.
