Увечары 21 снежня ў мінскі катэдральны касцёл Найсвяцейшага Імя Марыі прыбыў Бэтлеемскі агонь, які даставілі ў Беларусь каталіцкія скаўты.
Перад святыняю скаўцкую эстафету з агнём, запаленым у пячоры Нараджэння Хрыста ў Бэтлееме, сустрэў Мітрапаліт Мінска-Магілёўскі арцыбіскуп Тадэвуш Кандрусевіч. Пасля ўсталявання лампады з агнём перад прэзбітэрыем іерарх звярнуўся да прысутных.
Найперш ён падзякаваў скаўтам, якія ў чарговы раз прынеслі агонь у сталіцу нашай краіны. Сёння, адзначыў арцыпастыр, цяжка ўявіць вялікія набажэнствы і касцёльныя акцыі без скаўтаў. Скаўцкі рух у Беларусі развіваецца, фармуе будучых беларускіх грамадзянаў у духу любві да Бога і бліжняга, дадаў арцыбіскуп, нагадаўшы, што добры хрысціянін — гэта заўсёды добры грамадзянін.
Іерарх падкрэсліў, што ў гэтым годзе прыбыццё Бэтлеемскага агню мае сімвалічнае значэнне.
У мінскай катэдры адбываюцца адвэнтавыя рэкалекцыі, якія праводзіць былы вікарый катэдральнай парафіі, а сёння пробашч парафіі святой Барбары ў Замосці ксёндз Віталій Драздоўскі. Мэтай гэтых духоўных практыкаванняў з’яўляецца падрыхтоўка сэрцаў людзей да прыйсця Пана.
У Евангеллі паводле Яна нагадваецца, адзначыў Мітрапаліт Мінска-Магілёўскі, што святло прыйшло ў свет і цемра не змагла яго ахапіць. Гэтым святлом з’яўляецца Хрыстус — сонца, якое ніколі не заходзіць, і Яго Евангелле. Запалены ў пячоры нараджэння Хрыста ў Бэтлееме агонь з’яўляецца сімвалам гэтага боскага агню, які асвятліў свет дзве тысячы гадоў таму ў таямніцы Богаўцелаўлення.
Традыцыйна мы нясём яго ў нашы дамы, каб нагадваў аб радасці Божага Нараджэння і аб тым, што толькі святло Хрыста можа асвятліць духоўную цемру сучаснага свету, заўважыў арцыбіскуп.
Іерарх заахвоціў вернікаў браць Бэтлеемскі агонь дадому і запаліць падчас вігіліі, каб ён набліжаў нам таямніцу Богаўцелаўлення, якая мела месца ў Бэтлееме дзве тысячы гадоў таму, і дапамагаў у духу Евангелля адзначаць святы Божага Нараджэння, каб у новы год мы ўступалі ў святле Нованароджанага Збаўцы.
