Пошук


11.12.2019 09:01   Паводле: Grodnensis.by

У нядзелю 8 снежня ў парафіі Найсвяцейшага Сэрца Пана Езуса ў Рандзілаўшчыне (Казлоўшчына) адзначылі 30-годдзе вяртання забранай савецкімі ўладамі святыні вернікам. Урачыстасць узначаліў дапаможны біскуп Гродзенскай дыяцэзіі Юзаф Станеўскі.

Як паведаміў партал Grodnensis.by, сабраныя вернікі разам з іерархам дзякавалі за дар касцёла, які ў апошнія тры дзесяцігоддзі, як і першапачаткова, з’яўляецца месцам сустрэчы чалавека з Богам.

У гаміліі біскуп Юзаф падкрэсліў, што асаблівай малітвай трэба ахінуць тых людзей, якія паспрыялі вяртанню касцёла. «Няхай гэтыя адважныя вернікі будуць прыкладам клопату пра веру і парафію для маладога пакалення», — дадаў іерарх.

Святыня ў Рандзілаўшчыне, пабудаваная ў першай чвэрці ХІХ стагоддзя, перажыла нялёгкія часы, як і многія іншыя касцёлы на нашых землях. Пасля Другой сусветнай вайны яе зачынілі савецкія ўлады. Будынак стаў выкарыстоўвацца як склад, а пасля ўвогуле пуставаў.

Толькі ў 1989 годзе мясцовым вернікам удалося вярнуць сабе сваю святыню. 30 гадоў таму ў касцёле зноў быў запалены вечны агеньчык, які нагадвае пра прысутнасць тут Езуса Хрыста ў Эўхарыстыі. Ужо тры дзесяцігоддзі мясцовыя парафіяне зноў збіраюцца ў святыні, якая з’яўляецца цэнтрам іх духоўнага жыцця.

«Для Бога няма нічога немагчымага», — падсумаваў біскуп Станеўскі на заканчэнне святой Імшы, заклікаючы вернікаў давяраць Пану ўсе складаныя справы.

Абноўлена 11.12.2019 12:00
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.