Пошук


21.11.2019 09:39   Паводле: Kс. Юрый Марціновіч / Grodnensis.by

18–19 лістапада ў рэкалекцыйным доме пры парафіі святога Міхала Арханёла ў Навагрудку адбылася фармацыйная сустрэча для святароў Гродзенскай дыяцэзіі, якія маюць ад аднаго да васьмі гадоў святарства.

Як паведаміў партал Grodnensis.by, ксёндз Ян Сарэла, адказны за пастаянную фармацыю святароў у Гродзенскай дыяцэзіі, выступіў на сустрэчы з першай канферэнцыяй на тэму «Святарская чыстасць — крыніца пастырскай любові».

Ён падкрэсліў, што толькі святы святар можа стаць у сённяшнім свеце, які робіцца ўсё больш секулярызаваным, яскравым сведкам Хрыста і Яго Евангелля. Толькі такім чынам, па словах адказнага за пастаянную фармацыю, святар можа станавіцца для людзей правадыром і настаўнікам на шляху да святасці, а людзі, асабліва маладыя, чакаюць менавіта такога правадыра.

У межах сустрэчы маладыя святары таксама праслухалі лекцыі на актуальныя тэмы: «Пагрозы для сям’і ў сучасным свеце і каталіцкі адказ на гэтыя пагрозы», «Вернасць у цэлібаце і сужэнская вернасць», «Тоеснасць мужчыны і жанчыны ў Касцёле ў часы „гендарнай рэвалюцыі“». Лекцыі прачытаў доктар біблійнай тэалогіі Уладзіслаў Валаховіч, дырэктар дабрачыннага фонду абароны жыцця і сям’і «Адкрытыя сэрцы».

Прысутныя святары не толькі ўважліва слухалі свецкага спецыяліста, але і актыўна ўключыліся ў дыскусію і на канкрэтных прыкладах супольна шукалі адказы на няпростыя пытанні.

Кульмінацыяй сустрэчы стала святая Імша, цэлебрацыю якой узначаліў біскуп Гродзенскі Аляксандр Кашкевіч.

У прамоўленым Божым слове пастыр Касцёла на Гродзеншчыне падкрэсліў важнасць пастаяннай фармацыі свайго сумлення.

Іерарх дадаў, што сучасны свет і людзі, да якіх святар пасланы, хочуць у ім бачыць перш за ўсё спецыяліста па сустрэчы з Богам.

Біскуп адзначыў, што духоўная асоба павінна заўсёды быць у распараджэнні людзей і даваць ім прыклад жыцця, згоднага з Божым законам.

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Дух хоча жыць у нас –
мы пакліканы да вечнага жыцця