27 кастрычніка ў парафіі святых апосталаў Сымона і Юды Тадэвуша ў Лаздунах (Гродзенская дыяцэзія) адбылася парафіяльная ўрачыстасць, у якой узялі ўдзел Генеральны вікарый Мінска-Магілёўскай архідыяцэзіі біскуп Юрый Касабуцкі і куратар першага курсу Міждыяцэзіяльнай духоўнай семінарыі кс. Павел Эйсмант.
Адпуст сабраў не толькі мясцовых парафіянаў, але і вернікаў з розных куткоў Беларусі.
У скіраваным да ўдзельнікаў урачыстасці Божым слове біскуп Касабуцкі заахвоціў іх у цяжкіх жыццёвых сітуацыях ніколі не губляць надзеі і не пераставаць маліцца, просячы заступніцтва святога Юды Тадэвуша, які з’яўляецца нябесным апекуном у складаных, па-чалавечы безнадзейных справах.
На заканчэнне ўрачыстасці пробашч парафіі ў Лаздунах кс. Андрэй Бурак выказаў падзяку біскупу Юрыю за тое, што падзяліў з тутэйшымі вернікамі радасць парафіяльнага свята.
На памяць пра гэты праведзены разам дзень святар падараваў біскупу кубак з выявай лаздунскага касцёла, а яшчэ адзін перадаў у падарунак арцыбіскупу Тадэвушу Кандрусевічу, чыім апекуном з’яўляецца святы апостал Юда Тадэвуш.
