20 кастрычніка ў касцёле святога Роха ў аг. Палачаны (Маладзечанскі дэканат) з нагоды 105-й гадавіны з дня нараджэння кардынала Казіміра Свёнтка ўрачыста благаславілі мемарыяльны знак у гонар Сведкі веры.
Благаслаўленне адбылося падчас святой Імшы ў інтэнцыі вечнага жыцця для спачылага кардынала Свёнтка, цэлебрацыю якой узначаліў кс. прэлат Эдмунд Даўгіловіч-Навіцкі, канонік Мінска-Магілёўскага катэдральнага капітулу, дэкан Маладзечанскі і пробашч парафіі святога Юзафа ў Маладзечне.
У прамоўленым Божым слове святар, дзелячыся ўспамінамі пра асобу кардынала Казіміра Свёнтка, адзначыў, што гэта быў ва ўсіх сэнсах неардынарны, вялікі чалавек які, аднак, ніколі не ганарыўся, любіў гумар і парадак, прыроду і Пінск, сваіх бацькоў і Бацькаўшчыну, але найбольш любіў Бога і Найсвяцейшую Маці.
Парафія ў Палачанах, вядомая з XVII ст., спыніла сваю дзейнасць у савецкія часы пераследу веры, і зноў адрадзілася ў 1996 годзе шмат у чым дзякуючы намаганням тагачаснага арцыбіскупа Мітрапаліта Мінска-Магілёўскага кардынала Казіміра Свёнтка. Мемарыяльны знак, благаслаўлёны ксяндзом прэлатам Эдмундам Даўгіловічам-Навіцкім у новым палачанскім касцёле, пабудаваным замест знішчанай святыні святога Роха ў Аборку, стаў знакам удзячнасці мясцовых парафіянаў свайму былому пастыру.
Такім чынам святая Імша і благаслаўленне мемарыяльнага знаку сталі выразам падзякі Пану Богу за дар зямнога жыцця Сведкі і абаронцы веры кардынала Казіміра Свёнтка. Завяршылася набажэнства супольнай малітвай «Анёл Панскі» за спачылага кардынала.
