21 кастрычніка 1914 года ў мястэчку Валга на тэрыторыі сучаснай Эстоніі нарадзіўся чалавек, імя якога залатымі літарамі ўпісана ў гісторыю Касцёла на Беларусі — Казімір Свёнтэк, першы і адзіны ў сучаснай гісторыі краіны кардынал.
У гонар памятный даты з любоўю да Вялікага чалавека і сапраўднага Пастыра моладзь з парафіі святога Андрэя Апостала ў Нарачы (Мядзельскі дэканат) рэалізавала незвычайны відэапраект.
Юнакі і дзяўчаты зрабілі невялікі аматарскі фільм, які назвалі «Жыццё, як катэхізіс, або Рэкалекцыі з кардыналам Казімірам Свёнткам».
Сам юбіляр, напэўна, парадаваўся б менавіта такому арыгінальнаму падарунку, таму што і сам з задавальненнем здымаў аматарскія фільмы.
Адкуль узялася назва моладзевага праекту, прысвечанага 105-й гадавіне з дня нараджэння кардынала Свёнтка? Яе прадыктавала само жыццё, — прызнаецца нарачанская моладзь на інтэрнэт-старонцы сваёй парафіі Naracz.by, і распавядае такую цікавую гісторыю.
Калі Казімір Свёнтэк ляжаў хворы ў шпіталі, нарачанцы адпраўлялі яму паштоўкі са словамі падтрымкі. На адной з паштовак было напісана, што жыццё Яго Эмінэнцыі — гэта «катэхізіс, па якім можна вучыць маладое пакаленне сапраўднай веры». Такім чынам у адносінах да кардынала Казіміра Свёнтка гэтыя словы сталі крылатымі.
Чаму ўсё ж такі маладыя нарачанскія католікі вырашылі запрасіць сваіх аднагодкаў на рэкалекцыі з кардыналам? Таму што пасля прагляду гэтага фільма «на душы становіцца так чыста і светла, быццам ты ў споведзі пабыў».
Гэта яшчэ адна крылатая фраза, якую дзесяць гадоў таму сказала адна нарачанская дзяўчынка пасля таго, як пабывала на сустрэчы з кардыналам Свёнткам у Пінску.
Партал Catholic.by разам з моладдзю парафіі святога Апостала Андрэя запрашае на дваццаціхвілінныя «відэарэкалекцыі» з кардыналам Казімірам Свёнткам, каб адарвацца ад мітусні сучаснага свету, фальшывых ідалаў і прарокаў і апынуцца ў свеце любові, гармоніі, прабачэння і сапраўднага служэння Хрысту.
