У нядзелю 13 кастрычніка дапаможны біскуп Гродзенскай дыяцэзіі Юзаф Станеўскі наведаў вернікаў з вёскі Клешнякі. Тут, на тэрыторыі васілішскай парафіі, знаходзіцца капліца Найсвяцейшай Панны Марыі, Маці Міласэрнасці, пабудаваная ў 1996 годзе.
Для мясцовых вернікаў, жыхароў маленькай вёскі, візіт іерарха ў іх родную капліцу стаў вялікай і значнай падзеяй у іх простым, нетаропкім жыцці. Да сустрэчы дарагога госця вяскоўцы пачалі рыхтавацца загадзя, прыбралі і ўпрыгожылі сваю ўтульную святыню.
Сустракалі біскупа Юзафа хлебам-соллю, як здаўна прынята на нашай гасціннай зямлі.
Маленькія дзеці, хоць і не жывуць у вёсцы, таксама прыехалі ў гэты дзень да сваіх бабуль, каб падзяліць з імі радасць прыемнай сустрэчы. І малыя, і старыя аднолькава глыбока перажылі хвалюючы момант.
Біскуп Юзаф Станеўскі сваім пастырскім словам і айцоўскаю ўсмешкаю падтрымаў усіх прысутных вернікаў. З удзячнасцю за гэты візіт, яны шчыра яго зноў да сябе запрашаюць і абяцаюць чакаць.
