10 кастрычніка ў Міждыяцэзіяльнай вышэйшай духоўнай семінарыі ў Гродне прайшоў дзень засяроджання, які для семінарыстаў правёў пробашч парафіі Маці Божай Будслаўскай у Мінску ксёндз канонік Францішак Рудзь.
Духоўныя практыкаванні распачаліся ўвечары напярэдадні гімнам Духу Святому і супольнай Малітвай на заканчэнне дня з Літургіі гадзінаў.
Ва ўступным духоўным настаўленні кс. Францішак, які быў адным з першых выпускнікоў Гродзенскай семінарыі, акрэсліў першую тэму разважанняў: «Крыж як знак любові Бога да мяне».
Пры гэтым святар, чыімі намаганнямі быў пабудаваны не адзін касцёл, падкрэсліў:
«Каго Бог любіць, таму пасылае крыж. Кожнаму свой. І варта браць свой крыж і не ўскладаць крыжа на плечы свайго брата».
Над гэтымі словамі будучыя святары разважалі ў цішыні вечара і падчас ранішняй медытацыі.
Удзень кіраўнік рэкалекцый прапанаваў семінарыстам засяродзіцца на пакліканні на прыкладзе самай першай «духоўнай семінарыі» — супольнасці дванаццаці апосталаў, якіх вучыў сам Езус Хрыстус.
Пры гэтым ксёндз Францішак звярнуў увагу на асноватворную ролю малітвы ў будаванні блізкіх і даверлівых адносінаў з Богам.
Як неабходнае малітоўнае практыкаванне кастрычніцкі дзень духоўнага засяроджання ўключаў у сябе супольную малітву Ружанца, падчас якой семінарысты разважалі над таямніцамі зямнога жыцця Збаўцы праз заступніцтва Яго Найсвяцейшай Маці — Маці ўсіх святароў.
Дзень засяроджання працягнула адарацыя Найсвяцейшага Сакрамэнту і паяднанне з Богам у шчырай споведзі.
Кульмінацыяй духоўных практыкаванняў стала святая Імша, цэлебрацыю якой узначаліў ксёндз канонік з Мінска.
У прамоўленай гаміліі святар заахвоціў сваіх будучых калегаў штодзённа жыць Божым словам, даўшы пры гэтым сведчанне ўласнага вопыту семінарыйных гадоў і багатага святарскага жыцця.
