6 кастрычніка, калі ў Беларусі адзначаецца Дзень настаўніка, у санктуарыі Гродзенскай дыяцэзіі Маці Божай Каралевы нашых сем’яў у Тракелях адбылася дыяцэзіяльная сустрэча выкладчыкаў, настаўнікаў і выхавацеляў.
Як паведаміў партал Grodnensis.by, на сустрэчы, арганізаванай душпастырствам настаўнікаў і выхавацеляў Гродзенскай дыяцэзіі, сабралося больш за 150 прадстаўнікоў сферы адукацыі і выхавання з розных парафій Гродзеншчыны.
У межах сустрэчы ўдзельнікі паслухалі даклад «Супольнасць Касцёла — месца сустрэчы з Езусам і іншым чалавекам», з якім перад імі выступіў дыяцэзіяльны душпастыр настаўнікаў і выхавацеляў кс. канонік Антоній Грэмза. Святар звярнуў увагу на два аспекты: Касцёл як месца сустрэчы з Хрыстом і Касцёл як месца сустрэчы з іншым чалавекам.
Ксёндз Антоні падкрэсліў, што, каб Касцёл станавіўся месцам сустрэчы з Богам і чалавекам, патрэбная адпаведная падрыхтоўка да годнага прыняцця святых сакрамэнтаў і іх плённага перажывання.
Праграму мерапрыемства працягнула праца ў групах, дзе ўдзельнікі разважалі пра ролю настаўніка ў супольнасці Касцёла, парафіі, школы і сям’і. Гэта была магчымасць дзялення перажываннямі ад прысутнасці ў супольнасці і магчымасць сведчанняў.
Адбылася таксама адарацыя Найсвяцейшага Сакрамэнту, падчас якой удзельнікі даверылі Богу новы навучальны год і сваіх вучняў, сярод якіх працуюць штодзень.
Найважнейшым пунктам сустрэчы настаўнікаў і выхавацеляў стала святая Імша, якую цэлебраваў дапаможны біскуп Гродзенскай дыяцэзіі Юзаф Станеўскі.
У гаміліі іерарх падкрэсліў выключную ролю, якую адыгрываюць у жыцці настаўнікі, нагадаўшы пры гэтым, што кожны чалавек павінен рэалізаваць сваё пакліканне да служэння Богу і супольнасці, у якой жыве.
Ад імя Касцёла біскуп Станеўскі падзякаваў усім, хто ўдзельнічае ў працы навучання дзяцей і моладзі. Ён пажадаў, каб дабро, што прысутнічае ў дзецях і моладзі, якіх яны вучаць, было абуджана, каб высакароднае станавілася яшчэ прыгажэйшым і каб такім чынам можна было будаваць добрую будучыню маладых людзей, даручаных іх апецы, а таксама добрую будучыню нашай краіны і Касцёла.
