З 3 па 6 кастрычніка ў Сант’яга-дэ-Кампастэла ў Іспаніі праходзіць пленарнае пасяджэнне Рады Канферэнцый Біскупаў Еўропы, на якім беларускі епіскапат прадстаўляе біскуп Аляксандр Яшэўскі SDB.
Тэма пасяджэння: «Еўропа, час прачнуцца? Прыкметы надзеі». Удзельнікі аналізуюць культурную, палітычную і сацыяльную сітуацыю ў Еўропе, асабліва яе нядаўняе мінулае. У гэтым ім дапамагае прафесар палітычнай філасофіі з Францыі Шанталь Дэльсоль.
У межах пленарнага пасяджэння прадстаўнікі канферэнцый біскупаў Еўропы разглядаюць фактары, якія ўплываюць на касцёльную і грамадскую сітуацыю на кантыненце, нагадваючы пра хрысціянскія карані, уласцівыя еўрапейскай гісторыі і культуры.
Прадстаўленыя на пасяджэнні ініцыятывы біскупскіх канферэнцый, якія ўваходзяць у Раду, пакліканы ажывіць хрысціянскую надзею, якая натхняла на вялікія справы мноства святых.
Сёлетняе пасяджэнне праходзіць у кантэксце дваццацігоддзя з часу абвяшчэння Апекунамі Еўропы разам са святым Бэнэдыктам Нурскім і святымі Кірылам і Мятодам трох святых жанчын: Брыгіты Шведскай, Кацярыны Сіенскай і Тэрэзы Бэнэдыкты ад Крыжа (Эдыты Штайн).
Сант’яга-дэ-Кампастэла — горад святога Якуба, з даўніх часоў адно з найбольш папуярных месцаў пілігрымак у Еўропе і ў свеце. Падчас свайго побыту там біскуп Аляксандр Яшэўскі SDB сустрэў спадарыню Марыну, пілігрыма са Старых Дарог.
