15 верасня адбылася пешая пілігрымка дзяцей і моладзі, настаўнікаў і выхавацеляў, выкладчыкаў і катэхетаў з Гродна і ваколіц у санктуарый Маці Божай Яснагорскай Цярпліва Слухаючай на ўзгорку Надзеі ў Капцёўцы.
Як паведамляе партал Grodnensis.by, сёлетняя пілігрымка традыцыйна вырушыла ў трэцюю нядзелю верасня раніцай з гродзенскага касцёла Маці Божай Анёльскай (францішканскі). Пастырскае благаслаўленне на дарогу пілігрымам удзяліў адказны за моладзь у беларускім каталіцкім епіскапаце біскуп Юзаф Станеўскі.
Дзяцей і моладзь суправаджалі бацькі, многія ішлі цэлымі сем’ямі. Усе пілігрымы неслі да трону Маці Божай свае інтэнцыі і просьбы.
Вучні і студэнты прасілі Бога праз Марыю аб тым, каб мець дапамогу ў вучобе, а дзеці, якія рыхтуюцца да Першай Камуніі, маліліся аб тым, каб як найлепш падрыхтаваць свае сэрцы да прыняцця Найсвяцейшага Сакрамэнту.
Ішлі да Маці Божай і студэнты Міждыяцэзіяльнай вышэйшай духоўнай семінарыі ў Гродне, якія таксама прасілі аб Божым благаслаўленні ў новым навучальным годзе і давяралі Богу праз рукі Марыі ўсе свае патрэбы.
Для многіх гэтая пілігрымка, якая пачынаецца вераснёвым золкім ранкам і працягваецца некалькі гадзін, за якія трэба пераадолець больш за 15 кіламетраў, стала ўжо добрай традыцыяй.
Гэта асаблівы час малітвы, падзякі, просьбы і праслаўлення. Па дарозе часта завязваецца сяброўства паміж дзецьмі і моладдзю з розных парафій Гродна.
У ружанцовай малітве пілігрымы прасілі благаслаўлення для сем’яў Гродзенскай дыяцэзіі. Яны маліліся аб дапамозе ў вучобе, асаблівым чынам просячы Божай апекі і заступніцтва Маці Божай для студэнтаў, каб яны маглі супрацьстаяць спакусам сучаснага свету і памяталі, што асноваю шчаслівага жыцця з’яўляецца вера.
На ўзгорку Надзеі пілігрымаў прывітаў кусташ санктуарыя кс. Міхал Ластоўскі, які разам з парафіянамі штогод гасцінна адчыняе дзверы святыні і дома пілігрыма.
Вітаючы вернікаў, кусташ заклікаў даверыць усё сваё жыццё, сённяшні і заўтрашні дзень Пану Богу, які з’яўляецца крыніцай усялякага дабра.
Трэба спадзявацца, што супольнае духоўнае вандраванне дзяцей, моладзі, студэнтаў, настаўнікаў, законных сясцёр і святароў на пачатку навучальнага і катэхетычнага года ў санктуарый у Капцёўцы прынясе благаслаўлёныя плёны ў жыцці ўсіх удзельнікаў пілігрымкі.
