Пошук


20.08.2019 14:30   Паводле: Анастасія Пятрова / «Новае жыццё»

17 жніўня пры касцёле святога Казіміра ва Уселюбе, што на Навагрудчыне, упершыню адбыўся Казіміраўскі фэст #РАЗАМ.

Як паведамляе сайт газеты «Новае жыццё», у свяце, арганізаваным мясцовай парафіяй і аддзелам культуры Навагрудскага райвыканкама, узялі ўдзел больш за 250 чалавек. Сярод іх не толькі навагрудчане, але і жыхары іншых мясцін.

Вітаючы прысутных, пробашч уселюбскай парафіі святога Казіміра кс. Віталій Цыбульскі падзякаваў усім, хто актыўна ўдзельнічае ў жыцці парафіі і дапамог у падрыхтоўцы святочнага мерапрыемства.

Святар, які з’яўляецца ідэйным натхняльнікам і асноўным арганізатарам фэсту, адзначыў, што яго мэта — аб’яднаць людзей розных узростаў, веравызнанняў, прафесій, з рознымі захапленнямі і талентамі, а таксама даць магчымасць кожнаму ўдзельніку знайсці сабе занятак да душы, адпачыць цікава і карысна.

На тэрыторыі касцёла было абсталявана некалькі тэматычных зон, прысвечаных гульням, творчасці, танцам і іншым сферам дзейнасці.

Мясцовыя майстры правялі для жадаючых майстар-класы, адбылася бяспройгрышная латарэя і розыгрыш суперпрыза, працавалі музей пад адкрытым небам, выстаўкі-продажы і летнія кавярні. На галоўнай сцэне выступілі аматарскія калектывы і артысты Навагрудчыны і іншых раёнаў. У дзяцей асаблівай папулярнасцю карысталіся забавы ХІХ стагоддзя і сучасныя гульні.

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.