12 жніўня ў касцёле святога Казіміра ў Лепелі прайшоў дзень засяроджання для ўдзельнікаў апостальскага руху «Легіён Марыі» з віцебскай парафіі Езуса Міласэрнага.
Разважанні гэтага дня былі прысвечаны тэме: «Разважлівасць і пакора Марыі». У малітоўным засяроджанні ўзялі ўдзел восем легіянераў на чале са сваім духоўным кіраўніком кс. канонікам Валерыем Орсікам, пробашчам парафіі Езуса Міласэрнага ў Віцебску.
Духоўная сустрэча распачалася з малітвы праз заступніцтва святога Казіміра, нябеснага апекуна лепельскай парафіі. Пасля адбылася святая Імша з духоўным настаўленнем, у якім святар звярнуў увагу на важнасць малітвы ў штодзённым жыцці хрысціяніна, а перадусім легіянера.
Менавіта трывалая малітва па прыкладу Найсвяцейшай Панны Марыі становіцца крыніцай духоўнага досведу і сілаў, неабходных у жыцці і служэнні.
Пасля Эўхарыстыі ўдзельнікі ўшаноўвалі Езуса ў Найсвцейшым Сакрамэнце. Падчас адарацыі яны ўзносілі малітвы праз заступніцтва Багародзіцы, а таксама разважалі на тэмы: «Маці Божая развязвае вузлы людскога жыцця праз давер Яе Сыну», а таксама «Марыя ўзор нашага жыцця ў духу пакоры».
На працягу ўсяго дня засяроджання яго ўдзельнікі захоўвалі цішыню, што дапамагло стварыць сапраўдную малітоўную атмасферу. Нават падчас супольнага абеду легіянеры не размаўлялі паміж сабою, а слухалі чытанне ўрыўкаў са Святога Пісання.
Пасля абеду ўдзельнікі мелі магчымасць паразмаўляць з Богам у асабістай малітве, а таксама сузіраць хараство Творцы ў прыгажосці Яго стварэння на беразе возера, якое знаходзіцца адразу за касцёлам, разважаючы над пачутым у Божым слове і настаўленнях. Напрыкацы адарацыі адбылася супольная малітва Вяночкам да Божай міласэрнасці, а на заканчэнне ўдзельнікі атрымалі благаслаўленне Найсвяцейшым Сакрамэнтам.
Падчас працы ў групах легіянеры разважалі на тэму «Апостальства служэння». Яны дзяліліся сведчаннямі веры і вопытам сваёй працы, а таксама вызначылі далейшы кірунак свайго служэння.
На заканчэнне ўдзельнікі падзякавалі Богу і духоўнаму кіраўніку за магчымасць духоўных практыкаванняў, а таксама за ўмацаванне ў пакліканні легіянера.
У віцебскай парафіі Езуса Міласэрнага дзейнічаюць дзевяць актыўных удзельнікаў «Легіёну Марыі». Іх падтрымліваюць сваёй малітвай дапаможныя ўдзельнікі руху.
Апостальскае служэнне легіянераў даволі разнастайнае і патрабуе вялікай ахвярнасці. Яны наведваюць хворых ў абласным шпіталі, ходзяць маліцца ў анкалогічнае аддзяленне, наведваюць састарэлых, дзяцей у дзіцячых дамах і людзей з абмежаванымі магчымасцямі, дапамагаюць ў прыбіранні касцёла, а таксама дзеляцца верай з тымі, хто яшчэ не ведае Пана Бога. Кожны тыдзень удзельнікі «Легіёну Марыі» збіраюцца разам са сваім духоўным кіраўніком на супольную малітву.
