У Доме Святой Тройцы ў Баранавічах адбыліся традыцыйныя рэкалекцыі для членаў апостальскага руху «Легіён Марыі». Духоўныя практыкаванні аб’ядналі легіянераў з усёй Беларусі: на сустрэчу прыбылі больш за 100 асобаў — вернікі з Гродна, Ліды, Барысава, Віцебска, Глыбокага, Мінска, Смаргоні, Маладзечна, Мазыра, Баранавіч і іншых мясцін, каб аднавіць свае сілы, паглыбіць веру і супольна праславіць Бога праз заступніцтва Найсвяцейшай Панны Марыі.
Сёлета духоўным кіраўніком сустрэчы стаў магістр, канцлер курыі Пінскай дыяцэзіі і вядомы каталіцкі публіцыст – ксёндз Андрэй Рылка.
Дзякуючы свайму глыбокаму тэалагічнаму і філасофскаму вопыту, а таксама асабліваму дару слова, святар здолеў стварыць надзвычай цёплую, шчырую і даверлівую атмасферу. Яго навукі вызначаліся адначасова прастатой і высокай духоўнай мудрасцю, што дапамагло кожнаму ўдзельніку глыбей зазірнуць у сваё сэрца.
Галоўнай тэмай канферэнцый і духоўных настаўленняў сталі асабістыя адносіны чалавека з Богам.
На пачатку рэкалекцый святар звярнуўся да прысутных з важным папярэджаннем і заклікам да глыбокага роздуму: «Можна вельмі лёгка згубіцца ў розных добрых справах, можна сустрэцца з Божымі справамі, але Бога не сустрэць, можна займацца Божымі справамі, але не Богам».
Падчас рэкалекцый удзельнікі разам з душпастырам прыглядаліся да розных біблійных постацяў – прарока Іллі, Абрагама і Сары, прарока Ераміі, Яна Хрысціцеля і нарэшце святога апостала Пятра. Праз прызму іх жыццёвага шляху і выпрабаванняў ксёндз Андрэй вельмі трапна і пранікнёна паказаў, як важна выйсці за рамкі фармальнай рэлігійнасці і будаваць шчыры, жывы дыялог з Творцам, заснаваны на даверы і любові.
Праграма сустрэчы была вельмі насычанай і ўключала ў сябе штодзённую Святую Імшу, адарацыю Найсвяцейшага Сакрамэнту, споведзь, супольную малітву на святым Ружанцы.
Акрамя малітоўнага чування, рэкалекцыі сталі выдатнай пляцоўкай для абмену вопытам душпастырскай працы. Легіянеры дзяліліся гісторыямі са свайго парафіяльнага жыцця, абмяркоўвалі новыя спосабы абвяшчэння Евангелля і падтрымлівалі адзін аднаго ў хрысціянскім пакліканні.
Асаблівым і вельмі кранальным момантам, які надзвычай спадабаўся ўсім удзельнікам, стала сумесная вечаровая сустрэча. Падчас яе ксёндз Андрэй падзяліўся асабістымі ўспамінамі пра жыццё і самаадданую дзейнасць кардынала Казіміра Свёнтэка, з якім быў знаёмы асабіста. Жывы і шчыры расповед пра гэтага выбітнага сведку веры і адраджэння Касцёла ў Беларусі пакінуў глыбокі след у сэрцах легіянераў і стаў для іх магутным прыкладам трываласці і духоўнай мужнасці.
Напрыканцы рэкалекцый ксёндз Андрэй падсумаваў усе разважанні важнымі словамі на карысць кожнага чалавека:
«Бог мае індывідуальны падыход да кожнага з нас. Бог ніколі не адступаецца ад чалавека, чалавек адступаецца ад Бога».
Гэтая выснова стала для прысутных моцным заклікам да вернасці і трываласці ў малітве.
Удзельнікі рэкалекцый выказалі бязмежную і шчырую падзяку ксяндзу Андрэю за яго самаахвярнае служэнне, бацькоўскую чуласць і сапраўднае духоўнае кіраўніцтва. Легіянеры адзначылі, што дзякуючы яго адкрытасці, мудрасці і таленту прамаўляць да глыбіні чалавечай душы, гэтыя дні сталі для кожнага часам сапраўднага навяртання і перамянення сэрцаў. Гэты благаслаўлёны час у цішыні і малітве дазволіў удзельнікам умацаваць свой духоўны фундамент і вярнуцца ў свае парафіі з новым, магутным імпэтам для далейшай працы на хвалу Божую і Найсвяцейшай Дзевы Марыі.
