29 чэрвеня, ва ўрачыстасць святых Пятра і Паўла, біскуп Віцебскі Алег Буткевіч асвяціў у гонар гэтых вялікіх апосталаў Хрыста новазбудаваны касцёл у Бешанковічах.
Як паведамляе партал Сatholicnews.by, католікі райцэнтра, размешчанага ў цэнтры Віцебскай вобласці, ужо даўно чакалі гэтай падзеі. Парафія тут была адноўлена амаль два дзесяцігоддзі таму, а з’явілася яна яшчэ ў XVII стагоддзі.
У 1650 годзе Казімір Сапега пабудаваў у Бешанковічах першы касцёл. У тыя часы парафія налічвала больш за тысячу вернікаў.
У 1876 годзе на месцы старога касцёла была пабудавана з дрэва новая вялікая святыня, зачыненая і разбураная ў часы ваяўнічага атэізму савецкімі ўладамі.
Пасля адраджэння ў Бешанковічах каталіцкай супольнасці тут неслі служэнне кс. Казімір Гваздовіч, які быў прызначаны першым пробашчам у сучаснай гісторыі парафіі, кс. Павел Самсонаў і кс. Славамір Самковіч, пры якім былі зробленыя асноўныя будаўнічыя працы. У свой час пробашчам парафіі ў Бешанковічах быў і кс. Алег Буткевіч, цяперашні Віцебскі біскуп.
Урачыстасці распачаліся перад уваходам у святыню. Акрамя вернікаў з Бешанковічаў на асвячэнне храма прыехалі госці з Віцебска, Улы, Паставаў, Камаяў, Ваўкалаты і іншых парафій. Перад зачыненымі дзвярыма касцёла ўсе чакалі біскупа Алега Буткевіча.
Калі ўрачыстая працэсія са святарамі і міністрантамі падышла да святыні, вернікі прывіталі іерарха традыцыйным караваем.
Біскуп звярнуўся да прысутных з кароткім словам, у якім адзначыў важнасць гэтай падзеі для Бешанковічаў і для ўсяго Каталіцкага Касцёла на Беларусі.
Пробашч парафіі кс. Аляксандр Півавар уручыў пастыру Віцебскай дыяцэзіі сімвалічны ключ ад касцёла.
Біскуп Алег тройчы ўдарыў ім у дзверы святыні, пасля чаго ўрачыстая працэсія ўвайшла ўсярэдзіну.
Разам з біскупам урачыстую святую Імшу цэлебравалі дванаццаць святароў, якія, як апосталы ў Вячэрніку вакол Хрыста, сталі разам з біскупам вакол алтара.
У прамоўленай гаміліі біскуп Алег Буткевіч найперш падзякаваў усім святарам, якія працавалі ў Бешанковічах і якія так ці інакш прычыніліся да з’яўлення ў райцэнтры новай святыні.
Іерарх адзначыў, што Бог вяртае сваю прысутнасць нават там, дзе людзі з Ім змагаліся. Вельмі важна, што ў Бешанковічах пабудаваны новы касцёл, але яшчэ важней тое, што тут адбудавана жывая святыня, якая складаецца з чалавечых сэрцаў.
«Бог не патрабуе нейкага асобнага для сябе месца, — падкрэсліў іерарх, — бо Ён не змесціцца ў гэтых сценах. І гэта не столькі патрэбна Яму, але гэта патрэбна нам».
Пастыр звярнуў увагу на асаблівае значэнне, якое мае ў святыні алтар:
«Алтар — гэта стол Божы, дзе мы прымаем той хлеб, які ўмацоўвае нас на дарозе да неба. Гэта той хлеб, які нас непасрэдна яднае з Богам, з якога мы праз сваё сэрца прымаем Езуса Хрыста; хлеб, праз які ў нашай душы адбудоўваецца Божае валадарства».
Біскуп адзначыў, што менавіта за гэта аддалі сваё жыццё апосталы Пётр і Павел.
Акрамя таго, іерарх звярнуў увагу на тое, што кожная святыня нагадвае нам, што мы самі павінны быць святыняй Духа Святога. Біскуп параўнаў прыгожы белы касцёл з буслом, які лічыцца сімвалам Беларусі.
«Бусел, калі ляціць, сваім выглядам нагадвае крыж. А два крылы — гэта дзве хрысціянскія традыцыі: усходняя і заходняя, якія заўсёды суіснавалі на беларускай зямлі.
Гэты сімвал паказвае, што наша вера — адзіная, нягледзячы на людскія падзелы. Хрысціянам нельга варагаваць паміж сабою, а трэба разам шукаць шляхі супрацоўніцтва», — падкрэсліў біскуп Буткевіч.
Перад намашчэннем алтара вернікі разам са святарамі памаліліся Літаніяй да ўсіх святых, пасля чаго біскуп намасціў алтар святым алеем — хрызмам. У гэты час пробашч парафіі кс. Аляксандр Півавар намасціў чатыры адмысловыя знакі ў выглядзе крыжоў на сценах касцёла.
Потым на алтар была пастаўленая кадзільніца, у якую біскуп засыпаў духмянае кадзіла, пасля чаго акадзіў алтар і ўсю святыню.
Кс. Аляксандр атрымаў з рук біскупа запаленую свечку, ад якой запаліў свечкі перад алтаром, пасля чаго алтар быў засланы белым абрусам і на ім распачалася Эўхарыстыя.
Прыняўшы святую Камунію, усе ўдзельнікі ўрачыстасці праспявалі гімн Te Deum — «Цябе, Бога, праслаўляем».
На заканчэнне Імшы вернікі падзякавалі біскупу за асвячэнне святыні, а пробашчу кс. Аляксандру Півавару — за паспяховае завяршэнне яе будаўніцтва.
Пробашч, у сваю чаргу, выказаў падзяку ўсім тым, хто нейкім чынам прычыніўся да будаўніцтва касцёла ў Бешанковічах, а таксама тым вернікам і святарам, якія прысутнічалі ў храме ў гэты святочны і радасны дзень.
Асаблівая падзяка ад пробашча і біскупа была скіравана сёстрам уршулянкам, якія пэўны час працавалі ў Бешанковічах, і асабіста сястры Чаславе Навіцкай USJK, якая прысутнічала на ўрачыстасці.
Нарэшце на алтары святыні быў падпісаны ўрачысты акт аб асвячэнні касцёла.
Яго падпісалі біскуп Віцебскі Алег Буткевіч, пробашч парафіі кс. Аляксандр Півавар, а таксама святары, якія раней служылі ў Бешанковічах і ў гэты дзень прысутнічалі на ўрачыстасці.
