У нядзелю 5 мая з нагоды пятай гадавіны кананізацыі св. Яна Паўла ІІ у нарачанскай парафіі св. апостала Андрэя (Мядзельскі дэканат) з удзелам Апостальскага нунцыя арцыбіскупа Габара Пінтэра ўшануюць памяць Вялікага папы.
Праграма святкавання
10.15 — сустрэча Апостальскага Нунцыя ў Беларусі арцыбіскупа Габара Пінтэра каля касцёльнай брамы.
Пасля сустрэчы і прывітання вернікамі парафіі прадстаўніка папы Францішка ў нашай краіне на пляцоўцы перад касцёлам дзеці выканаюць танец у гонар св. Яна Паўла ІІ, пасля чаго адбудзецца ўскладанне кветак да фігуры святога Папы, усталяванай каля святыні.
Апостальскі нунцый таксама прывітае нарачанскіх гаспадынь — удзельніц конкурсу выпечкі «папскіх» пірожных.
10.30 — выступленне гурта «Подых Духа» ў гонар св. Яна Паўла ІІ
11.00 — св. Імша падзякі за дар кананізацыі св. Яна Паўла ІІ. Цэлебрацыю ўзначаліць Апостальскі нунцый у Беларусі арцыбіскуп Габар Пінтэр.
Пасля Імшы прадстаўнік Святога Айца ўзнагародзіць лепшых нарачанскіх гаспадынь і ўдзельнікаў конкурсу малюнкаў, які праводзіўся сярод дзяцей парафіі.
На заканчэнне ўрачыстасці адбудзецца ўшанаванне рэліквій св. Яна Паўла ІІ, якія з пашанай захоўваюцца ў нарачанскім касцёле св. Андрэя, апостала.
