Дырэктар Хрысціянскага сацыяльнага цэнтра ў Мінску сястра Часлава Навіцкая USJK запрашае ў сваім лісце перажыць Пасхальны Трыдуум з людзьмі з абмежаванымі магчымасцямі.
Ліст змешчаны на samaranin.by.
Дарагія сябры,
як звычайна праходзяць нашы святы? Мы едзем да бацькоў і родных, праводзім час разам. Гэта важна, але, мне падаецца, на святы мы часта займаемся сабою. Як вядома, наш Цэнтр дапамагае людзям з абмежаванымі магчымасцямі. Мы вырашылі на селетнія Трыдуум і Пасху атуліць іх асаблівай апекай. Засяродзіцца, нарэшце, на бліжнім.
Запрашаю вас на Трыдуум у духу Добрага Самараніна. У Вялікі чацвер мы збяромся разам на св. Імшы а 18-й. Пасля яе пазнаёмімся з нашымі вазочнікамі, вып’ем гарбаты ці кавы.
Кожны зможа ўзяць на гэты час аднаго чалавека з інваліднасцю пад сваю апеку. Проста падаць яму печыва, калі той не дацягнецца, пагаманіць, дапамагчы падняцца на трэці паверх Цэнтра ў свой пакой.
Мы будзем усе разам, але ў кожнага вазочніка будзе свая сям’я.
У Вялікую пятніцу мы збяромся на Літургію ў 15.00, у суботу памалюем велікодныя яйкі, падрыхтуем Цэнтр да свята і ў 18.00 пачнем святкаванне Пасхі св. Імшой. У нядзелю а 10-й урачыста перажывем св. Імшу Уваскрасення, з’ямо велікодны сняданак, пасмажым шашлык. А пазней сацыяльнае таксі забярэ вазочнікаў і развязе іх па дамах.
Запрашаю вас перажыць Вялікдзень так, як вы, напэўна, ніколі гэтага не рабілі.
З павагай
сястра Часлава Навіцкая
дырэктар Хрысціянскага сацыяльнага цэнтра
Па ўсіх пытаннях званіце мне асабіста: +375 29 170 61 69 (с. Часлава)
Праграма:
Вялікі чацвер
18.00 — святая Імша Вячэры Пана
Вялікая пятніца
15.00 — набажэнства Мукі Пана
Вялікая субота
14.00–16.00 — благаслаўленне страваў на велікодны стол (кожныя паўгадзіны)
18.00 — святая Імша
Вялікдзень
10.00 — святая Імша
