![](/3/images/news/2019/04/2019-04-05-kr.jpg)
13 красавіка ў Гродне адбудзецца набажэнства Крыжовага шляху вуліцамі горада, а 14 красавіка, у Пальмовую нядзелю, — працэсія з вербамі.
Як паведамляе партал Гродзенскай дыяцэзіі Grodnensis.by, да ўдзелу ў Крыжовым шляху запрашаюцца вернікі гродзенскіх парафій, а таксама парафій тых населеных пунктаў, якія знаходзяцца недалёка ад Гродна, — дзеці, моладзь, дарослыя. Удзельнікам просьба прынесці з сабой свечкі.
Крыжовы шлях пачнецца ў 17.30 пры катэдральным касцёле св. Францішка Ксавэрыя.
Затым вернікі пройдуць вуліцамі горада (па Савецкай плошчы да Бэрнардынскага ўзгорку), разважаючы над стацыямі Крыжовага шляху Езуса Хрыста.
У 19.00 у касцёле Адшукання Святога Крыжа адбудзецца святая Імша.
На працэсію ў Пальмовую нядзелю і святую Імшу, якая пройдзе пасля яе, запрашаецца моладзь Гродзенскай дыяцэзіі і ўсе вернікі. Удзельнікам патрэбна ўзяць з сабой вербы.
Пачатак працэсіі ў 13.00 на Бэрнардынскім узгорку. Удзельнікі пройдуць па Савецкай плошчы да катэдральнага касцёла св. Францішка Ксавэрыя, дзе ў 14.00 распачнецца святая Імша.
Як і ў мінулыя гады, будзе праходзіць своеасаблівы «конкурс вербаў». Кожная гродзенская парафія, а таксама моладзевыя суполкі будуць прэзентаваць свае святочныя вербы.
Традыцыйна на Пальмовую нядзелю прыпадае Сусветны дзень моладзі, які ў гэтым годзе будзе адзначацца пад дэвізам «Вось я, слуга Пана. Няхай мне станецца паводле твайго слова» (Лк 1, 38).