Паводле легенды, традыцыя ўсталёўваць калядныя батлейкі — стаенкі з яслямі, што прадстаўляюць Нараджэнне Хрыста, — паходзіць ад святога Францішка Асізскага.
Менавіта ён у 1223 г. з дазволу і благаслаўлення папы Ганорыя III зрабіў першую батлейку ў мястэчку Грэччо ў Італіі. Яна была зроблена для таго, каб у свята Божага Нараджэння навочным чынам скіраваць увагу вернікаў на цэнтральную таямніцу гэтай урачыстасці — прыйсце ў свет Бога ў чалавечым целе.
Назва «батлейка» паходзіць ад мястэчка Бэтлеем, дзе нарадзіўся Збаўцы. Так называюць не толькі лялечныя стаенкі, але і тэатралізаваныя прадстаўленні на тэму Божага Нараджэння, вельмі папулярныя з Сярэднявечча і да нашых дзён.
Ужо праз 100 гадоў калядныя батлейкі ўсталёўваліся практычна ва ўсіх італьянскіх касцёлах, а з Італіі гэтую традыцыю перанялі ва ўсёй Еўропе, адкуль яна пазней трапіла ў краіны Паўночнай Амерыкі.
Батлейкі на працягу гісторыі значна відазмяняліся. Іх выконвалі з рознага матэрыялу, ды і «набор» саміх фігур быў розны. Але абавязкова ў кожнай батлейцы была святая Сям’я — Немаўлятка Езус, Марыя і Юзаф, — якую дапаўнялі іншымі постацямі.
У апошні час ўсё большую папулярнасць набываюць так званыя «жывыя батлейкі», у якіх сімвалічныя фігуры замяняюць жывымі істотамі і людзьмі. У нашых парафіях на свята Божага Нараджэння таксама ствараюць розныя батлейкі, якія так падабаюцца і дзецям, і дарослым.
Партал Catholic.by запрашае падзяліцца прыгажосцю таго, што вы перажываецце ў сваіх касцёлах і капліцах.
Прапануем нашым чытачам падзяліцца фотаздымкамі сваёй парафіяльнай батлейкі, каб як мага больш людзей маглі глыбей адчуць і паўней перажыць радасць вялікай таямніцы Нараджэння Езуса Хрыста.
Патрабаванні да фотаздымкаў:
- Не больш за 3 фотаздымкі.
- Памер не менш за 1200х800 px.
- Подпіс, кім зробленыы і дзе (назва парафіі ці касцёла і мясцовасці).
Чакаем вашых фотаздымкаў, якія можна даслаць на адрас электроннай пошты: info@catholic.by
або на вайбер +375 (25) 537 50 43
